Ka seiñ FKJGP War Jaintia Circle da pynsñiaw ko yei sñiawngooh wa khroo yaka chnat MePDCL waroh kawi hajrong i chimkhia yong ki wow pynyoh Transformer noh ya ka chnong Pamtadong haka 30-11-2022 hadien wa da maham ka seiñ wow khang tala syndon yaka yung krehkaam yong katai ka chnat hapoh chi tayaw lada ym chimkhia u pynyoh bordiñ ya katai ka chnong.
Kam wow pynkynmoo wa ka seiñ hadien wa da yoh ujor ko na u waheh chnong yong kani ka chnong ha ka 24-03-2021 uwa da kyrpaad leh ya ka seiñ wow booddien lang ya ini i kaam hajrong i dooh bordiñ yong katai ka chnong la kamwa 10 snem duna, kamtæ ka seiñ ha ka 30-03-2021 da lai e ko dei thoh ha u Asst. Executive Engineer, MePDCL Amlarem Distribution Sub-Division wei hadien ini won da lai e dei thoh biang ha u Executive Engineer Jowai Distribution Division haka 09-12-2021 tangwa neiliang ka chnat ym bien ko wow leh iyi iyi leh wei ym bna ko.
Kamtæ neiliang ka seiñ da e por ko chitayaw ha ka 21-11-2022 ha ki laad pathai khubor wow pynyoh bordiñ ya katai ka chnong wei da yoh bordiñ noh ha ka 30-11-2022.
Puræ leh: La 10 snem khlem bordiñ ka chnong Pamtadong, maham ka FKJGP wow khang ya ka yung krehkaam ka MePDCL
