U Commissioner & Secretary ka Planning Department ka sorkar Meghalaya da pyntip u wa jylla da ku ka Gross State Domestic Product (GSDP) da 8.2% neibynta u snem mang tangka namo u Financial Year (FY) 2021-22. Heiwa ka GSDP ka jylla ha u 2011-12 hadooh u 2017-18 toh kawa suki bha na waroh ki jylla heiwa da em ko hei kyrdan wa 33, wei da ku smat nadooh u 2018-19 hadooh 2020-21.
Ini mut wa na kawa suki dooh i heh i san, da poi ko cha ka kyrdan wa 19 na kiwa smat dooh u heh u san ki jylla hapoh ka ri India.
Da ong wa ini i heh i san ka Meghalaya toh neidaw wa khlan ka sorkar wow pynlut. Nadooh u 2018, ka sorkar Meghalaya da pynlut ko ar chah naka T. 9,858 klur ha u 2017-18 cha T. 18,881 klur ha u 2022-23. Ini da man leh iwa da ku awjan 50% wa da pynlut ha kiwi boon ki kaam iwa da wanrah yei heh i san i wym jooh em iwa da booh ya ka jylla ha ka rynsan deilang wa kiwi ki jylla ka ri.
Ka sorkar da ong ko leh wa i duna ka GSDP da pynman ya ka jylla wow em ko cha tre dooh hapoh ka ri ha u snem FY 2013-18.
Katkam ka yukheiñ wa pynmih da ka RBI ha ka tayaw wa dep, da pynyoo leh ya ki GSDP ki jylla, wei ka Compounded Annual Growth Rate (CAGR) neibyna ka GSDP ka Meghalaya ha u snem 2011-12 hadooh 2017-18 toh 2%, iwa man iwa khian dooh na waroh ki jylla wa em hapoh ka ri. Tangwa da ku smat bha ha u 2018-19 hadooh u 2020-21, heiwa da kynthiar wei da ku da 13 tylli ki thaw yow poi cha i kyrdan wa 19 hapoh ka ri.
Ka sorkar da pynche ko leh wa ki yukheiñ wa pynmih da ka Reserve Bank of India (RBI) neibynta ki GSDP ki 33 tylli ki jylla neibynta u FY 2021-22 wa FY 2020-21 deiwa kheiñ da ka Constant Prices. Ka RBI da pynmih ko leh ya ka GSDP yong waroh ki jylla neibynta u snem 2020-21. Wei kamwa jooh leh, ka RBI da pynmih ko ya ka GSDP wa da kheiñ neibynta ki 10 snem heiwa da kheiñlang waka CAGR yong ki jylla. Deiwa kheiñlang yong waroh ki 10 snem da pynyoo wa suki bha i heh i san ka Meghalaya wei ini toh neidaw wa tlot ha u snem FY 2013-2015. Hadien ini da yoo wa da sdang i heh i san ka jylla khamtam ha u FY 2021-22.
