U Montri Rangbah ka jylla, u Conrad Sangma ynne da e kti u ya ki kot chim wai yei thaw namo ka Land Lease cha kiwa chong chnong ka dong Balsrigittim wa Warimagre ka Williamnagar, East Garo Hills District hei emlang u MLA u Marcuise Marak.
Kamwa 1200 tam ngut kiwa chong chnong kini ki dong da sah ki ha i thaw sorkar da ki snem wei da thoohlaad ki ya ki yei thaw sah wa pura.
Kiwa chong chnong kini ki dong da chem chitom bha ki khamtam wym em kot em sla wow chim ram wei wow yoh kiwi ki kaam pynroi na ka sorkar.
Neiliang kiwa chong chnong da kyrpaad ki ya ka sorkar wow pynbait ya ini hapoh i yahkhmat u Montri Rangbah wa ka chnat Revenue.
U Conrad hawa e yei klam da yaroh u ya u Marcuise Marak wa da minot wei da booddien u yeini wow pynbait noh ya ini i kaam.
Da ong u wa ha Tura wa Williamnagar, da em kattu katni ki dong kiwa chem kam ini i eh i khor heiyatoh wa i thaw wei ka sorkar dang kreh ko wow e kot thaw ya ki leh kamjooh yow ye ki wow yoh myntoi naka sorkar.
Ha kani ka sngi u Conrad wa u Marcuise Marak da e kti ki ya ki kot ki sla cha ki 17 ngut kiwa chong chnong ka Balsrigittim wa 6 tylli cha kiwa sha ka Warimagre.
