Ka Seiñ Kur Dkhar East Jaiñtia Hills District, ynne ka sngi 12 tarik, u Kmaichonglad, da pynkup burom kyrpang ko ya kawa yoh Miss Meghalaya 2022 kamjooh kawa yoh Miss Northeast 2022, ka Irene Dkhar, kawa na ka chnong Rymbai, East Jaiñtia Hills haka yalang wa da pynman ha Community Hall, Khliehriat West, East Jaiñtia Hills, ha ryngkat i phooh i phieñ wei chongkun hadien wa ka khon ka kur da wanrah ko ya ini i naam yaka kur, ka chnong kamjooh yaka jylla waroh kawi ha uni u snem.
Ha katai ka yalang pynkup burom ya ka Irene Dkhar, da pynphooh pynphieñ deiwa emlang kiwa yahkhmat ka Seiñ Kur Dkhar East Jaiñtia Hills District, nadooh u President, u Teras Dkhar, u Addl. General Secretary, u MH Dkhar wa kiwi tawon kiwa yahkhmat wei kiwa kitkaam deilang wa ki dkhot yong ka Seiñ Kur Dkhar-EJHD kamjooh kiwa na ki Circle wa ki Unit waphær waphær yong ka Seiñ Kur Dkhar EJHD. Da synranlang ya ka Irene Dkhar da kiwa ha-yung ha-sem yong ka wa kynthup ya ka bei wa u pa ko.
Da chongknor ya katai ka yalang pynkup burom da u MH Dkhar uwa da e leh yei klam waiphang deiwa ong ini toh iwa daw neh parom wei i kmen wei sñiawsarong, neibhah ym jooh em jia kam ini haka parom-pateiñ yong ka Kur Dkhar East Jaiñtia Hills District, heiwa da yoh ka kur ya ka Irene Dkhar, ka khon khyllood miat kynthai, kawa da jop ym du yaka Miss Meghalaya 2022 tangwa da lai ko wow jop syndon yaka Miss Northeast 2022.
Da ong haroh u wa ka pansnget kawa ka Irene Dkhar wanrah wei deiñ ko katni, kam ka Miss Meghalaya 2022 wa Miss Northeast 2022, man ko ka pansnget yong i warom wei i naam ya ka Kur Dkhar East Jaiñtia Hills District hi waroh kawi. Katwa kamtæ ka kur Dkhar East Jaiñtia Hills, sñiawkmen, sñiawsarong wei hun i mynsien ko jrut næ wow yoh payu lane para kur kam ka Irene Dkhar.
U President ka Seiñ Kur Dkhar EJHD, u Teras Dkhar, hawa e u yei klam yong oo, da pynsñiaw u yei sñiawkmen, sñiawsarong wei i sñiawngooh wa khroo hadooh kattæ kattæ ya ka Irene Dkhar kawa da ye u wanrah kat ya kani ka naam ka burom wa khroo neibynta yong ka hi, ya kiwa ha-yung ha-sem yong ka, wei kamjooh leh ya ka Kur Dkhar East Jaiñtia Hills hi waroh kawi wa kynthup yaka jaitbru yong i wa ya ka jylla Meghalaya yong i.
Da e u leh yei kitbok kitrwiang ya ka Irene Dkhar yow nang lai ko chakhmat neibynta ki yakhun wa sam chakhmat nadooh hapoh ka ri India wei chadooh cha palat ri. Da e haroh u ya ki kyntien sneiñ, kyntien kroo ha kiwa boon ki bynta heiyatoh wa kammon u ksoh yei maya saya wei i yatylli ka Kur Dkhar East Jaiñtia Hills District.
U Besterwell Dkhar, Asstt. Professor, yong ka Jaiñtia Eastern College, Khliehriat, hei klam pynkup burom yong oo ya ka Irene Dkhar, da da ong u ka Kur Dkhar waroh kawi dap ko dei sñiawkmen mynsien i wym ye de u batai, hadien wa da tip ka Kur Dkhar EJHD wa ka Irene Dkhar da jop ko ya ka yakob kam ka kynthai kawa miat tam ha Northeast waroh kawi. Kamtæ da kitbok kitrwiang u ya ka yow nang lai chooh chooh ko chakhmat ha i lai luti yong ka, wow yakhun chooh chooh ya kam itai i jait yakhun sa ha kiwi tawon ki rynsan kiwa rap heh chooh chooh.
Ka W.M. Dkhar, Asstt. Prof. Kiang Nangbah Govt. College, Jowai hei klam yong ka da pynsñiaw ko yei kmen wei sñiawsarong wa da em ka khyllood Kur Dkhar kam ka Irene Dkhar wa da wanrah ya katai ka naam waka burom ya ka kur Dkhar hi waroh kawi ha East Jaiñtia Hills District wei yaka jylla Meghalaya. Da e mynsien chooh chooh ko yaka Irene Dkhar kam ka Miss Northeast 2022 wow nang lai ko chakhmat khlem da randien hei beh yei thong yong ka.
Da pynphooh pynphieñ chooh chooh ya katai ka yalang pynkup burom deiwa e yei rwai kyrpang dooh neibynta ka Irene Dkhar, da u Lincoln Nixon Dkhar wei wa da pynboood sa da i e sñiawbha da ki ar tylli ki Memento wow sahkynmoo neibynta i jop yong ka ya ka yaka Miss Meghalaya 2022, wei yaka Miss Northeast 2022, pynbood won sa i e ya ki riam ki kup tynre, ki syntu wa ka song poisa T. 6000.
Kiwi tawon kiwa e yei klam ha katai ka sngi, toh ka Bythygrace Dkhar, EM Seiñ Kur Dkhar EJHD, kawa da e yei klam pdiang sñiawbha, wa u Deolangki Dkhar, EM Seiñ Kur Dkhar EJHD, heijooh i por kam u Waheh Chnong, Wapungskur uwa da e yei klam sñiawngooh.
