Ka Khasi Student’s Union deiwa emlang u President wa heh dooh ka seiñ, Lambokstar Marngar wa u General Secretary, u Donald V Thabah deilang wa kiwa yahkhmat ka KSU West Jaiñtia Hills da lai hiar ki cha ka chnong Mukroh sa chisien ha ka 12 tarik uni u bnai yow lai e mynsien ya ki manyung kiwa da khlaad hei chah siat ha ki pulit ka Assam.
Ha katai ka sngi, ka seiñ da yachem ko leh ya ki pulit kiwa yang sonteri ha katai ka thaw kiwa da khana yei duna ki tiar ki tar wow yada.
Ka seiñ da chem ko wa hadooh katni ym pu em ki dak ki chin wow booh ya ka Border Outpost ha katai ka thaw kawa em i eh wa i wym chngaaiñ ya kiwa chong chnong.
Ha i yachem kiwa yahkhmat ka seiñ wa kiwa yahkhmat ka chnong, da pynsñiaw ki wa dang em i eh wa i wym sñiaw chngaaiñ wei lada ka sorkar ym ye ko wow booh ya ka BOP hadooh wa kut u pood yong ka chnong ym em yumut.
