Ki soo ngut ki MLA ka jylla kiwa kynthup ya u H.M. Shangpliang (Ex-TMC), u Bendic R. Marak (Ex-NPP), ka Ferlin C.A. Sangma (Ex-NPP) wa u Samuel M. Sangma (IND) ynne da psiah ki cha ka Bharatiya Janata Party (BJP) ha ka yalang wa man ha Headquarter ka BJP ha nongbah New Delhi.
Ki MLA da psiah ki cha ka BJP hei emlang u MP ka Rajya Sabha, u Anil Baluni, u Montri Rangbah ka Assam, u Himanta Biswa Sharma, u National Spokesperson uwa pait leh ya ka thaaiñ mihsngi u Sambit Patra wa kiwi kiwi.
U Anil Baluni da pdiang burom u ya ini i psiah ki MLA cha ka BJP wei da pynkup burom u leh ya ki.
U Rituraj Sinha da ong u wa ka yalap ‘Modi for Development, BJP for Meghalaya’ toh iwa da kawæh bha ka la’ær ha Meghalaya, wei ka jylla da pdiang ko yei chynna jngai u Montri Rangbahdooh ka ri, u Narendra Modi neibynta ka thaaiñ mihsngi namo ka Vision for North East iwa da wanrah ya i roi i paar.
Hadien wa pdiang u ya ki MLA da ong u wa ka Party dang khlan ko kat dang mih ki sngi.
U Himanta Biswa Sharma da pdiang u ya kini ki MLA deiwa ong wa ha ki 3 jylla ka BJP da synchaar ko ha ka thaaiñ mihsngi deiwa pynkhreh leh ya ka Election ha ka jylla Tripura, Meghalaya wa Nagaland.
U H.M. Shangpliang da ong u wa ka BJP da ku bha ko hapoh Meghalaya wei ki paidbah da chynna ki yeiwa kreh u Narendra Modi.
Da ong u wa ka Meghalaya emkaam ko i kylla wei ini i kylla toh du lyngba u Montri Rangbahdooh ka ri. Da ong u leh wa ka sorbah Guwahati dang heh ko kat dang lai ki sngi katwa ka Shillong wa ka Tura da chah ieh ki chadien.
