Ka Department of Zoology wa Department of Fishery Science ka St. Anthony’s College, Shillong deilang waka Bio Resources Development Centre (BRDC) ynnin da pynman ki ya ka ‘International Conference on Biodiversity and Conservation cum Workshop on Traditional Medicine’ ha Executive Conference Hall, Wollaston Annexe, St. Anthony’s College Shillong heiwa u James P K Sangma, u Montri ka chnat Forest and Environment wa Health & Family Welfare da embynta u haka yalang wai kam u kongsan.
Hawa e yei klam, u James P K Sangma da ong u wa kani ka yalang toh wow ya e kylliang yei buit wei wow pynchlur ya kiwa e dawai kynbat wow pteiñ ki wow pynkemkaam yei stat yong rim.
Da ong u wa kiwa e dawai kynbat toh kiwa da pynemkaam yei stat ki da ki spah snem tangwa ha kini ki por da sdang ki wow duna tangwa sñiawkmen u wow yoo wa da pynman ya kam kani ka yalang yow pynchlur wei wow pynim ya ini i rukom e dawai kiwa da leh da ki longchwa manchwa.
Da kyrmen u wa ha ki sngi wow wan ini i rukom e dawai tynre wa i rukom e dawai i stat ka juk wa katni daw ye ki wow ya imlang. Da pyntip u leh wa kam chibynta i dap 50 snem ka jylla Meghalaya, ka sorkar daw wai ko yaka Ayush & Traditional Wellness Centre ha BRDC Experimental Farm ha chnong Laitmynsaw ha Upper Shillong wa da kyrchaan poisa da ka Ministry of Tribal Affairs ka sorkar India.
U James da ong u wa ka Meghalaya toh kawi na kiwa mahajon dooh heiyatoh wa ki jhoor ki jhep, ki dieñ ki siej wei emkaam wow yada wei wow pynneh pynsah ya ki, deiwa khana leh wa ka sorkar da chimkhia ko yei emkaam u pynneh ya kini deiwa sdang boon ki kreh kam wow pyrchang hapoh ka jylla wei ya ini da leh da ka poisa wa em hapoh ka Meghalaya Minor Minerals Reclamation Fund.
Da khana u leh wa yow pynchlur ya ki khynroo wow pynneh pynsah ki ya ka rymaw, ka Meghalaya da sdang ko leh yaka Payment for Ecosystem Services (PES) deiwa yarap poisa cha kitu kiwa kreh yow pynneh pynsah ya ka rymaw.
