U James P K Sangma, Montri ka chnat Health & Family Welfare, ynne da wai u ya ka DAE-Civil Hospital Cancer Wing, Civil Hospital Shillong: OPD Facility/Indoor Facility & Day Care Facility wa em ha Civil Hospital Shillong.
Hawa e yei klam, u James P K Sangma da ong u wa ini toh iwa heh bha hapoh ka jylla Meghalaya wei da man ko leh kawa nyngkong dooh ka Cancer Wing wa em ha ka thaw sumaar sorkar. Da pynsñiaw u yei sñiawngooh ya waroh kiwa emkti kiwa da kreh chimtom wow pynman kaam yeini.
Da pyntip u leh wa ka Meghalaya da pynkrehkaam ko ya ka First Cancer Care (FCC) Project kawa daw lai lang wa kani ka Cancer Wing. Wei i sumaar Cancer toh iwa chimpor da ki snem, kamtæ toh u man kiwa ryntih bha hawa kreh, wei kani ka FCC da wanrah yow sylli yow chem smat ya kiwa yoh Cancer, neibhah deiwa chem smat daw yarap bha ko ya kiwa chah ktah yow smat chait ki kamjooh wow im ki.
Da khana u leh wa ka sorkar dang em ko hei pynkhreh wow sdang kam kani ka jooh ka Cancer Wing ha Tura wei kyrmen u wa kini ki kreh waroh wa e yarap ka sorkar daw ye u sumaar ya kiwa yoh Cancer ha i rukom wa biang.
Chooh chooh da ong u wa ini toh iwa dang sdang donhi wei dang em chiboon kiwa daw hap u leh heiyatoh wa i e sumaar wei ka sorkar da pynchlur ko leh ya kiwa chong chnong wow ya krehlang ki yow yaleh pyrchah yei kjut Cancer lyngba ki Village Health Councils kiwa da sdang hapoh jylla yow kynjoh cha waroh ki chnong wa em cha kdong cha chmiang.
Ha kani ka sngi, u Montri leh da pynlait u ya ka kot wa e pyrtuid ‘Meghalaya Mission Cancer Prevention and Early Detection’ kawa ye u yoh deiwa Download naka website ka State Cancer Society of Meghalaya.
Ha kani ka sngi da emlang leh u Sampath Kumar, Principal Secretary, Health & Family Welfare, u Ram Kumar S, Mission Director, NHM, u Dr. P Kumar, Regional Director, Atomic Mineral Directorate for Exploration and Research wa kiwi kiwi de.
