U MLA wa da hiar chuki na ka seiñ AITC uwa da lai psiah katni cha ka Bharatiya Janata Party (BJP), u Himalaya Muktan Shangpliang da ong u wa ya ka TMC ki paidbah ha Mawsynram ym pdiang ki ka, wei toh ki paidbah wa da sneiñ ya oo wow psiah noh cha ka BJP, neibhah ki paidbah ha ka Constituency kawa em cha palatsor ki sñiawthooh ki hadooh katwon u Modi da yarap u ya ki nadooh i por wa chah ktah ha u COVID-19.
Da ong u wa i emkaam waroh hapoh ka jylla Meghalaya toh du u Prime Minister Narendra Modi uwa ye u pynmankaam, iwa da pynman ya oo wow chim yei rai wow psiah noh cha ka BJP neibynta ki kaam pynroi khamtam cha ki thaw palatsor.
Ki soo ngut ki MLA kiwa da hiar chuki noh wa kynthup ya u HM Shangpliang, u Bendic R Marak, ka Ferlin C A Sangma wa u Samuel M Sangma da psiah pura ki cha ka Bharatiya Janata Party (BJP) ynnin ka sngi ha Delhi heiwa da pdiang burom ya ki da u President ka Party u JP Nadda wa uwa yahkhmat ka BJP na Assam u Himanta Biswa Sarma wa kiwi kiwa yahkhmat ka BJP.
Neiliang ka MLA warim ka NPP kawa da hiar chuki noh, ka Ferlin C A Sangma da ong ko wa i mih noh na ka NPP toh neidaw wym bna ka NPP ya ka kam ka MLA, heiwa da ong ko wa ym em yumut ko wow neh sah ha ka Party ka wym burom pyn ya ki yong ka hi ki MLA. Da ong ko wa i mih na ka NPP toh kawa da dep wow pyrkhat bha deiwa pait ya ka Party kawa rap bha wei kawa rap heh yow ye wow rap chakri ya ki paidbah wa ya ka jylla.
U Benedic R Marak uwa man u MLA warim yong ka NPP da ong u wa heipor wa man u kam u CEM ha GHADC 8 bnai, tangwa u Montri Rangbah, u Conrad Sangma ym bna u ya oo heiwa da pyndooh noh u ya ka chuki.
Ka Bharatiya Janata Party (BJP) Meghalaya Unit ynne ka 15 tarik da pdiang burom ko ya kini ki soo ngut ha Shillong, wei ha kani ka sngi ka BJP da pynbna ko leh ya ka Election Management Committee, heiwa da thung Convener da u AL Hek wa kiwi kiwa kitkaam wow pait yei bha i biang i pynkhreh yong ka Party ya ka Election MLA kawa daw wan.
