Ka yalehke Ranji Trophy wa nyngkong ha Shillong hadien 4 snem u sdang ko haka 20 tarik uni u bnai heiwa ka Meghalaya Cricket Association da pynkhreh ko wow pdiang biang ya kani ka lympung yalehke First Class Cricket heiwa ka Meghalaya daw yachem ko waka Sikkim ha madan ka MCA wa em ha Polo.
I sien wa khaddooh wa da pynman ya ka yaleh Cricket Ranji ha Shillong toh ha u Kmaichonglad (Dec) 2018, kawa man leh ka samoi wa nyngkong wa chimbynta ka Meghalaya ha ka Ranji Trophy.
Ki yalehke ka Meghalaya ha u 2019-20 da pynman cha baar ka jylla neidaw wa dang pynchna yaka madan ka MCA, katwa ha u 2020-21 da pyndam ya kani ka lympung yaleh Cricket neidaw wa em ka khlam COVID-19. Da pynman yaka ha u snem wa bood deiwa pynkhian ya ka heiwa ka Meghalaya da pynman ko ya ki yalehke yong ka ha Gujarat.
Ha kani ka samoi 2022-23 ka Ranji Trophy dapoi biang ko ha Shillong hadien soo snem.
Ha kani ka tayaw da wan leh u Abey Kuruvilla, General Manager ka BCCI yow lai pait ya ka madan ka MCA deiwa emlang u Girish naka yung krehkaam u Secretary.
Neiliang u Kuruvilla uwa jooh yalehke leh ya ka India da pynsñiaw u yei sñiawhun yei pynbiat wei pynkhreh wei kani daw man ko leh kawi na ki le tylli ki yalehke ka Ranji Trophy wa daw pynman ha Shillong ha kani ka samoi. Da yaklam bniah u leh wa ki heh ka MCA wa yahkhmat da u President, u Naba Bhattacharjee.
U Kuruvilla uwa jooh man kam u Fast Bowler ka India da kmen u wow yoo ya ki Wicket kiwa emlang u phlang kiwa da duna bha katni.
Kiwa kwah u wan paitke ye ki wow wan wei ym hap su bai psiah ki.
