Ha ka 18 tarik uni u bnai, ka Ramakrishna Mission Sohra da lai e yarap sñiawbha ko ya ka chnong Lumlangdoh Nongjngi-A da 200 tylli ki kymmor heiwa da e mar ar tylli samen cha kiwa chong chnong.
Neiliang u Secretary Maharaj yong ka Ramakrishna Mission da ong u wa i thmu toh wow e yarap ya kiwa dooh wa duk ha kani ka thaaiñ khamtam hei puræ puthi.
Neiliang u Manbha Lyngdoh uwa pait ya yei kreh ka Mission ha Ri-loom Jaiñtia, da ong wa ka Ramakrishna Mission man ko neibynta wow chakri ya ki para bru wei ini toh i chakri ya u Blai, da ong chooh chooh u wa kani ka Mission da wan ko neibynta wow pynmiat pynbha yaka chnong kamtam yaki thaw puræ kam ki skur.
Da yoh leh yei klam na u waheh chnong, u Ram Samati uwa da ong wa i wan ka Mission toh i kyrkhu wa khroo tam ya ka chnong ka thaw khamtam ya kiwa dooh wa duk. Neiliang won u Secretary Chnong wa u Assistant Waheh Chnong da kyrkhu kyrdoh ki ya ka Mission wow nang ye chooh chooh ko wow leh yei kaam wa bha wei wow pteiñ chooh chooh ki yei kaam wa bha neibynta kiwa chong chnong.
Kamtæ ka chnong waroh kawi da pynsñiaw ko yei sñiawngooh wa khroo yei wan ka Ramakrishna Mission hapoh ka chnong ka thaw khamtam ya u Secretary Maharaj yong ka Ramakrishna Mission Sohra wei kamjooh ya u Manbha Lyngdoh wa da yah luti u ya ka Mission cha kani ka thaaiñ.
