Ha ka yalang wa da man ha ka 16 tarik uni u bnai, kiwa kitkaam wa hakhmat ka Congress Party kiwa kynthup ya u Carnel Lamin, President, u Lari Sungoh, Secretary, u Elias War wa u Emil Pale kiwa man ki dkhot ka Congress Party ha Khliehriat Mynkrem kawa man ka chnong wa em hapoh ka Nartiang Constituency da psiah noh ki cha ka NPP.
Da psiah NPP leh u Phidalis Sutong uwi na kiwa kyrchaan wa hakhmat u kyrtong samen na 1-Nartiang Constituency.
Ya kini waroh 5 ngut da pdiang sñiawbha da u MLA ka thaaiñ, u Sniawbhalang Dhar uwa man leh u kyrtong ka Party NPP.
Ki 5 ngut hawa e yei klam yong ki da pynsñiaw ki ya ki yurim wa psiah cha ka NPP toh hajrong i yoo ya ki kaam wa i lehbha u MLA wa katni u Sñiawbhalang Dhar, da yaroh ki leh yei skem ka sorkar MDA hapoh i yahkhmat ka Party NPP, kamjooh leh ki kaam pynroi wa boonjait wa da mih na kani ka sorkar dei yahkhmat u Conrad Sangma kam u Montri Rangbah.
U Sniawbhalang Dhar hei klam yong oo da pynsñiaw u ya chiboon ki kaam wa da leh kani ka sorkar wa katni wei da paan u leh yei kyrchaan wa pura na kiwa chong chnong khnang yow yoh biang u chna sorkar ha u 2023 neibynta i yoh myntoi ki paidbah khamtam cha ki thaaiñ palatsor.
