Ka Seiñraij Jowai deilang waka Seiñraij Mynso ha ka thong wow pynskem pynskit yei man kyrpang ka jaitbru Ñiawtrep Ñiawskum haka 24 wa ka 25 tarik uni u bnai da pynman ki ya ka Dorbar Ñiamtre ha Madan Lumiariang, Mynsoo, Laskein Block kawa em hapoh West Jaiñtia Hills.
Ha ka sngi nyngkong yong kani ka Dorbar Ñiamtre ki khon khynroo khyllood wa mihkhmat na ki chnong ki raij waphær da yoh ki chiboon i myntoi heiwa u Pa Dolloi ka Elaka Jowai, u Waheh Puramon Kynjin deilang ki waheh wasian yong ki ar Raij da wan ki wow ya embyntalang ha ki yalang waphær wada pynman ha Yung Dorbar ka Chnong Mynso-A.
Ha ka sngi wa bood yong kani ka Dorbar Ñiamtre wada pynman ha madan Lumiariang, ki khon ka Ñiamtre na kylleiñ ki chnong ki raij da wan embyntalang ki hei riam i bait wa yoo phooh yoo phieñ heiwa u Pator Raij Jowai, u Waheh Raymond Nartiang kam u chongknor da e u ki kyntien yahkhmat heiyatoh wa ka thong yong i pynman ya kani ka Dorbar Ñiamtre ha kylleiñ ki chnong ki raij katwa u Kynmoomiki Situng kam uwi na ki khynroo ka Seiñraij Mynso da siang u ki kyntien ngoohblai ngoohsyiem neitæ pynbood i pynhær lama da ka men Mon Lamare kam kawi na ki manbei wa da heh rta ha chnong Mynso wa ki kyntien pdiang burom won da pachat da u Pynhunmi Chen, General Secretary Seinraij Mynso.
U Waheh Washington Shylla, Adviser Seiñraij Mynso hawa klam da ong u ka chnong Mynso nadooh warim toh ka chnong wada seiñ da sdang chirrup wa ka niam ka rukom, ka dustur riti heiwa ki Soo Kur (Pakma, Lyngdoh, Syntem, Situng) em ki ka bynta wa kyrpang hapoh ka chnong ka raij neitæ bood ki San Kur wa ki Lephaw Kur, hadooh kini ki sngi wa katni ka chnong Mynso daman ko ka chnong waheh wa krai katkam i yah ka juk ka por wei i man kyntang man kyrpang yong ka hadooh kini ki sngi dang yoh u yoo u sakhi heiwa ki kur ki jait watoh bhah toh bynta u leh u pyndep ya ki sarin yong ka niam hapoh ka raij ka chnong chisien chisnem hadooh kini ki sngi man kiwa lai bait lai ryntih.
Ha kani ka Dorbar Niamtre ki waheh wasian kiwa da e da pachat ya ki kyntien hajrong ki phang wapher toh u Chadlok Dkhar, Vice Chairman Ñiamtre Committee, Seinraij Jowai uwa da klam ha ka phang wa ong ‘Sarong ha ka niam kawa da biang nadong chadong’, neitae u Moonlight Ktung, President Sein kyntu Niamtre 12 Dolloi da klam u ha ka phang wa ong ‘Ka niam wa ka jaitbru kat kam i thaw’ katwa ka Bakhiamon Rynjah, Seng Khasi Ri Raij Laban da klam ko ha ka phang wa ong ‘Ka tynrai u khun Khasi-Pnar ban pynjanai ia ki’.
Chooh chooh najrong i klam i kappæ da pynchongchit pynwyrngia ya kani ka Dorbar Ñiamtre da ki chaad ki rwai wada pynkhreh na ki khon khynroo khyllood yong ki Seiñraij waphær waphær.
Khaddooh chwa wow poi ka bynta wakut yong kani ka Dorbar, ka Ebrielty Sungoh kam kawi na ki manbei yieñ ko wow e ki kyntien makhane katwa u woh Beni War kam uwi na ki Kñi waheh rta ka Raij Mynso kam ka dak i pynkut ya kani ka Dorbar Niamtre da pynhiar u ya ka lama.
