Ka Rumshnong Youth Club Bataw kawa da seiñ nadooh u snem 1967 da lai ko chakhmat wow pynchlur ya ki kaam yalehbol hapoh ka chnong Bataw kamjooh hapoh ka thaaiñ hi waroh kawi heiwa ynne da sdang ko ya ka 1st RYC Bataw Knockout Football Tournament deiwa sdang ya ka yalehke wa nyngkong hapyrdi ka Ten Star FC Bataw pyrchah ya ka UYSSC Umlyngsha.
Ya kani ka lympung yalehbol da wai pyrda da u Shaniahskhem Dkhar kam u kongsan heithaw u Bison Shylla neidaw wa boonkaam u kamjooh heithaw u Waster Sympli da wan mihkhmat da u Bhalang Suchiang, Waheh Chnong warim ka chnong Bataw.
Neiliang u kongsan hawa e yei klam yong oo da yaroh u yaka Club wa da chim ko ya kani ka luti wow pynchlur ya ki khon khynroo ka chnong deiwa kyntu u ya ki khon khynroo u man ki kiwa mih chakhmat wow tynrong yei bha yei miat yong ka chnong. Da ban joor u wa ki khynroo wymtoh u chah yahbakla ki wei emkaam bha u sñiawthooh ki yei dawa ka jaitbru wow mih ki khynroo u dawa leh ya ki ain wa khlan kam ka ILP yow man ka stieh yaka jaitbru waka mynried.
Hawa kyruiñ cha ka yalehke, da man ko kawa yoosuk bha heiwa ya da yoh u pynkhih jaar nyngkong da ka Ten Star FC lyngba u Deibor Suchiang ha ka minit kawa 33 kawa da neh hadooh wa kut ka kylla step. Ha ka kylla miet, ka Ten Star da yoh biang ko u pynkhih jaar lyngba u Seibor Suchiang ha ka minit wa 57.
Dei yaleh chitom kiwa yalehke ka UYSSC Umlyngsha da yoh u su chi kool lyngba u Namphrangmi Talang haka minit wa 61. Hapyrdi ka yalehke wa yoosuk bha da yoh ka Ten Star FC lyngba u Seibor Suchiang u thap biang haka minit kawa 78, kamtæ da kut ka yalehke dei jop yaka Ten Star FC da 3-1.
Kiwa rah yei naam Champion yong kani ka lympung daw yoh ki yaka song poisa kawa T. 50,000 katwa kiwa yoh wa ar won u yoh ki yaka song poisa kawa T. 30,000. Waroh ki liang kiwa da wan chimbynta da em ki 16 tylli.
