Ka ASHA Payment Mobile Application kawa nyngkong dooh ya kawa da wai paidbah da ka sorkar Meghalaya ha u bani Wisu (Mar) 2022, da wanrah ko yei bha nadooh wa da pynemkaam ya kani ka App heiwa de dep wow su hadooh T. 12.2 klur cha kiwa kreh kam ki ASHA ha kylleiñ ka jylla Meghalaya.
Lyngba kani ka App da pynduna ko yei por wow su ya ka nong cha kiwa kreh ASHA heiwa da chimpor du 5 sngi hawa nujor na ka 120 sngi nachwa.
Kani ka App da pynlait ko leh ya kiwa kreh ASHA wow lai rah ya ki kot ki sla yow pynsakhit yei kaam wa da pyndep kiwa da hap wow lai e cha ki Doctor dep te lai won ki kot ki sla cha kiwa pait yaka poisa poilaiñ wei ini waroh da chimpor hadooh 4 bnai iwa da ktah bha ya ki ASHA kiwa da hap wow yang slem wow yoh ya ka nong yong ki tangwa katni ini da baam por i du 5 sngi donhi.
“Ka sorkar yong i da booh ko hakhmat dooh yei chait i khiah wei uwi na ki chrot wa skem yong i chait i khiah toh ki hajar ngut kiwa kreh ASHA ha kylleiñ ka jylla. Ki da chim ki yei kaam wa kongsan wei da wanrah ki yei jop yaka Meghalaya pyrchah yaka khlam COVID-19. Wei deiwa pynsuk wei pynsmat yei su tulop ya kiwa kreh ASHA man ko iwa khian tam wa ye i wow su kylliang yei kreh chitom wa khlem da pyrkhat de ya idæ. Nga sñiawkmen O wa i da pynkrehkaam i da ka ASHA Payment App kawa da ye wow pyndooh yei eh wei jinjar i rukom su tulop wa jooh chimpor palat 4 bnai, katni da hiar hapoh chi tayaw”, da ong u Conrad Sangma, Montri Rangbah.
Ha jylla Meghalaya da em palat 14 lak ngut ki kynthai wei da pynkrehkaam ya ka National Health Mission (NHM) ha Meghalaya ha u snem 2005 wei kiwa kreh kam ki ASHA toh ki kynthai kiwa chakri hakhmat dooh neibynta kiwa dooh wa duk ha ki thaaiñ palatsor kiwa em kamwa 7000 tylli ki chnong, wei ha ka jylla da em katni 7067 ngut kiwa kreh ASHA, iwa mut wa ha man ki chnong da em kammon kammon kawi ka ASHA wei da man ki leh kam kiwa e sikai nadooh ki baam wa tei yei doh i pran, i emkaam wow lehkhooid wa kiwi kiwi de kiwa yatoh wa i chait i khiah kamjooh wow pynche leh yei yarap wa da e ka sorkar ha ki thaw sumaar.
Ka sorkar da dep ko wow phah hadooh T. 80 klur neibynta u snem 2020 hadooh 2022, kawa da sahteiñ da boon snem. Wei da pynku leh ya ki yarap poisa namo ka Incentive neibynta kiwa kreh ASHA wa kiwa yarap. I su ka jylla yaka tulop yong ki wakreh ASHA wa kiwa yarap ya ki man ko T. 1500 wa T. 500 chi bnai, wei ya kani da pynku da ar chah itæ cha ka T. 3,000 wa T. 1,000. Katni i su ya kiwa kreh ASHA wa kiwa yarap man ko T. 7,500 wa T. 3,250 chi bnai.
Katkam wa khana u Additional DMHO ka Ri-Bhoi District, u Dr. D. Blah, “Hadien wa pynkrehkaam ya kani ka Payment Application ha ka District, da e mynsien ya chiboon ki wakreh ASHA neibhah katni da yoh ki ya ki Incentive man-i-por wei khamtam heipor wa biang, i wym jooh man kamni nachwa.”
Kawi kawa kreh kam ka ASHA hapoh ka chnong Jorgin, da ong ko du wow yoh ya ka tulop hap wow pynlut chiboon i por wa ka poisa yow pyndap yaki Form kamjooh hei lai i wan tangwa katni deiwa em kani ka App ym emkaam de wow leh ya ini waroh kiwa ye u pyndep lut lyngba ka Mobile Phone.
Ym du wa pynsuk yei eh ki wakreh ASHA tangwa wot ki ANM, PHC kam ka T. Syiem kawa da ong wa nadooh wa wai paidbah ya kani ka App, i kaam yong ki leh da pynsuk ko deiwa khniooñ donhi kattu katni sien ha Mobile Phone te dep wot i kaam.
Katni da ye wow su ya ki ASHA man-ka-tayaw khlem pynslem, nadooh wa wai paidbah yaka App da su T. 9.14 klur cha ki ASHA wei yeini leh da pynsakhiat da kawi kawa kreh ASHA ha ka chnong Pahamrimai, ka Tina Mary Sohkhlet kawa da ong ko wa hachwa kani ka App, ki tulop waroh sahteiñ ki, iwa da man iwa eh wow pteiñ yei kreh kam ki ASHA. Tangwa katni da em ka su Online, waroh ini da kylla i wei da e mynsien wei sñiawkmen wow kreh yei kaam.
