U MLA ka PDF na Umsning Constituency, u Jason Sawkmie Mawlong u psiah noh u cha ka National People’s Party ha ka 6 tarik uni u bnai ha ka yalang wa daw pynman ha madanbol ka Umsning Patarim.
Ka PDF toh kawa em katni 4 ngut ki MLA wei na kini, u Hamlet Dohling uwa man leh kam u Montri sorkar daw psiah noh u cha ka NPP ha ka 10 tarik.
Ini mut wa sah sa du u Banteidor Lyngdoh uwa man leh kam u Montri sorkar wa u Gavin Mylliem, MLA ka Sohra kam kiwa dang neh hapoh ka PDF.
U Hamlet wa u Jason kamwa leh kiwi ki MLA wa katni, daw hap ki wow e chithi ieh noh yei man kam ki MLA yow psiah cha ka NPP.
U Samlin Malngiang, MLA ka HSPDP na Sohiong leh toh uwa daw psiah cha ka NPP wei uwa daw ieh noh kamjooh yei man MLA.
Kiwi ki MLA kiwa da antaad wa daw kynthiar seiñ kiwa daw hap ieh noh yei man MLA toh u Mayralborn Syiem na Nongpoh wa u PT Sawkmie na Mawlai kiwa da antaad toh kiwa daw psiah UDP, wei waroh daw poi 11 ngut ki MLA kiwa da ieh noh yei man MLA chwa wow kut i por.
Kam wow pynkynmoo wa ka Ampareen Lyngdoh na East Shillong, u Mohendro Rapsnag na West Shillong, u Kimfa Marbaniang na Rambrai-Jyrngam, u Benedic R Marak, na Raksamgre, ka Ferlin CA Sangma na Selsella wa u Himalaya M Shangpliang na Mawsynram toh kiwa da dep wow e chithi wow ieh noh yei man MLA yow psiah noh cha kiwi ki Party chwa u kut i por man MLA.
