Ha ka yung dukan wa da em ka Javed Habib Salon, ka Bata Showroom kamjooh ka Yutran Inn, ynne da wai ki sa kawi ka dukan kawa tip kam ka Blackberrys Showroom kawa man kam ka dukan wa dai ya ki riam ki bait yong chynrang kawa em pyn ha chrooh ka Yutran Inn ha Ladthadlaboh, Jowai.
Ya kani ka dukan da wan wow wai ya ka ynne ka sngi da u MLA ka Jowai, u Wailadmiki Shylla uwa da ong wa i pyrtuid Blackberrys toh iwa da pawnaam kam kiwa chan Suit ya ki chynrang kamjooh leh kiwi ki riam yong chynrang wei ini daw pynsuk ko ya ki bru neibhah kiwa boon hi kiwa lai thied riam cha Shillong toh kiwa na ri-loom Jaiñtia hi.
Kamtæ da sñiawkmen u wa kattu da em kam kani ka dukan ha chnong Jowai deiwa kyntu leh ya kitu kiwa jooh beh chadooh cha Guwahati yow thied riam wow psiah ki ha kani ka dukan neibhah ini man ko kam chibynta wow pynku ya ka chnong ka thaw wa ka sor ka yong i.
Chooh chooh da ong wa kani man ko leh ka laad e kreh ya ki khon khynroo wei manda sdang boon kam kini ki jait dukan, mynstep mankawi ki pytruid wa pawnaam ha ki boon ki jait leh daw wanpoi ki ha chnong Jowai, kamtæ da khut u ya kitu kiwa jooh lai cha baar ka chnong Jowai yow psiah ki ha kani ka dukan neibhah kattu ym emkaam de wow lai jngai.
Neiliang u tre dukan, u Dawan Biam da pynsñiaw u yei sñiawngooh ya ka chnong Jowai kamjooh ya ka Dorbar Chnong Ladthadlaboh kiwa da ya krehlang yow ye u wanrah ya kani ka dukan kam chibynta wow pynthymme leh ya ka chnong Jowai wei ym duk de u lai cha Shillong heiwa i dor leh man i jooh.
Kamtæ da kyrpaad u ya kiwa chong chnong ka Jowai wow wan thied yeiwa emkaam ki na kani ka dukan kawa da em lut ya waroh iwa emkaam ki chynrang heiyatoh wa i riam i bait yow e mynsien leh ya ki wow wanrah ya kiwi ki jait Company, ki jait Showroom yow man ka chong kawa phooh wa phieñ.
Da ong u leh wa lada em iwon iwon i wym sñiawsuk lane iwa dang duna heiyatoh wa ki riam wa em ha kani ka dukan toh u pyntip cha ki yow ye ki u pynbiang katwa ye i bor ki.
