Ka Sohkha Government Higher Secondary School (Science Stream) kawa da sdang nadooh u snem 2014, ynne ka sngi da yoh ko dei yong ka hi ka yung Building namo Science Block wada chna hei lut kamwa T. 1,73,13,100 wei da wan wai paidbah leh yaka da u Montri ka chnat Puræ Puthi ka sorkar jylla uwa man leh u MLA ka thaaiñ, u Lahkmen Rymbui.
Ha kani ka sngi wai paidbah da emlang ka R.M. Kurbah, Director of School Education & Literacy Meghalaya Shillong, u B.D.R Tiwari, Commissioner & Secretary ka chnat Education ka sorkar Meghalaya, ka A.P. Syiem, DSEO West Jaiñtia Hills District, u R. Sumer, Principal Sohkha Govt. Higher Secondary School wa kiwi.
U P.S. Suchen kam uwi na kiwa yahkhmat chnong ka Sohkha hawa klam da pynsñiaw u yei lai luti kani ka skur nadooh wa sdang ko ha u snem 1959 hadooh wa poi ha kani ka kyrdan. Heijooh i por da pynsñiaw haroh u yei emkaam wa kani ka skur toh u yoh ko kam ka Auditorium, ka School Bus, u chna pynmiat yaki bynta ka yungskur wada sih wa kiwi.
U Lahkmen Rymbui hawa klam pynsñiaw u yei kmen wa da ye u wai ya kani ka Science Block kawa man kawi naka bynta i lai luti wa sñiawsuk, deiwa ong leh wa hapoh ka chnat Puræ Puthi em chiboon kiyi kiyi wa hap u leh wei hapoh ka 5 snem ka sorkar da yaleh ko katwa ye u pynbiang yei emkaam ki skur sorkar haka jylla, kamjooh ka thaaiñ Amlarem leh da yoh ko chiboon i myntoi.
“Hawa katni ka sorkar da leh ko, emkaam leh yaki khynnah skur u lehbha ki hei puræ puthi yow ku ka imlang sahlang kamjooh ka mynried i im samen yong ki,” da ong u Lahkmen.
Heiyatoh wa ka Integrated Course wa 4 snem ka wow sdang ha B.Ed College Jowai, ong u wa em sa du kattu katni ki jnit ki jnat neibynta u thung ya kiwa sikai neibhah wa nadooh u 2030 chaneiñ waroh kiwa sikai haki skur hap pyndep ki yaka Degree wa 4 snem, kamtæ kyntu u yaki khynnah skur wa manda dep Class 12 u man kiwa pynkhreh ya idæ deiwa pyrchang pynpsiah neibhah wym toh iwa suk wa em du 50 tylli ki Seat.
Da yaroh u leh yaka sorkar deiwa ong hapoh kini ki 5 snem da leh ko chiboon kiyi kiyi wa yatoh wei puræ puthi, wei em napyrdi ki laiñ e sikai wym em ha Shillong, ki khynnah ye ki u lai cha Tura.
“Kam uwa mihkhmat i pait i wym du yaka Constituency yong i tangwa yaka jylla waroh kawi, wei du kani hi ka sorkar wa ye u yarap hadooh 25 tylli ki College, najrong wa pynyoh Building thymme yaki Secondary wa Higher Secondary,” pynrap u Lahkmen.
