Ynne ka sngi, ka Synjuk ki Waheh Chnong Ri Jaiñtia (SWCRJ) da booh ko ya i kyntu neibynta ki chnong kiwa em hapoh East wa West Jaiñtia Hills heiyatoh wa ka Election MLA 2023.
Neiliang u Army Lipon uwa man u President ka SWCRJ da ong u wa ha ka yalang wa da man ha ka 22 tarik u Kmaichonglad (Dec) 2022, da rai da iwi i yumut wa heiyatoh wa ki yalap Election namo ki Election Campaign ha ki dong ki chnong wym toh wow wanrah ya ki paaid wa boon kam ha ki snem wa nachwa neibhah wanrah ko ya i lut ya u kyrtong, wanrah ko ya i awri awra, i taroi ha ki dong ki chnong, kamjooh leh i sahkut ki kari wa kiwi kiwi.
Hajrong ini da kyntu u ya waroh ki waheh chnong ki ar District wow kitkhlieh wow chim ya ka rai katkam wa da rai ka synjuk wow pynsñiaw ya kini ki kyndon ha ki dong ki chnong yong ki heiwa da booh kyndon wa ym toh u em palat 4 tylli ki kari uwi u kyrtong.
U General Secretary ka Synjuk, u Bishar Shylla da kyntu u ya ki waheh chnong wow ye ki wow pynlai bait ya ka Election ha ki ar District heiwa da kyntu u ya ki wym hoi wow emliang ki wei kamjooh leh ymhoi wow yoobeiñ ki ya kiwi tawon wei kam ki waheh chnong lada emliang ki na uwi namo kawi ka kyrtong ymtoh u pynyoo ki yeitæ wei kamjooh leh ymhoi wow man kiwa lehbeiñ ya kiwi tawon khnang wow neh i chongsuk ha ka chnong ka thaw.
Da kyntu u leh ya ki paidbah wa ymtoh u man kiwa chongchit wei wow yasih iwi ya iwi neibhah ini i kaam toh wow jied ya kiwa mihkhmat wei ymtoh wow pynman ki yei awri awra.
U Bishar da ong u leh wa ki khynroo ymtoh u chim kabu ki ya kani ka Election wow ya baam ya dih deiwa chim kabu na ki kyrtong wei kam ka synjuk kwah ko wow man kiwa em i burom i akor weiwa u em ki wa ka chnong kam ha kini ki por.
Neiliang u Joint Secretary ka Synjuk, u Tellme Phawa da ong u wa ha kani ka Election toh u man ko kawa khooid wow dam u paan næ chim poisa na ki kyrtong khnang wow ye ki wow wanrah ya ki kaam pynroi waphær waphær na ki chnat sorkar deiwa kyntu leh u ya ki paidbah wa ymtoh u baam poisa ki neibhah manda man MLA ki kyrtong yow ye ki wow wanrah ya ki Scheme wa har rukom neibynta ki chnong ka Ri-loom Jaiñtia.
Da ong u leh wa ka Ri-loom Jaiñtia katni em i chiboon i duna khamtam ha i puræ puthi khnang wow yoh ya ki skurbah wa ki College wa boon wei deiwa em ki thaw puræ pyn hapoh ki ar District daw pynsuk ko ya ki manbei manpa neibhah ki khon yong ki daw ye ki u lai puræ pyn hapoh ki District.
U Tellme da kyntu u leh ya ki waheh chnong wow bood ya kini ki kyndon ka Synjuk wow krehlang khnang wow lait u pynsihdur ya ka Election wei wow wanrah i yei bha.
