Ki dkhot ka Trinamool Congress (TMC) kiwa em hakhmat wow pynman ya ki yalang kiwa man kam ka Convening Team kiwa man leh ki Primary Member naka 5-Sutnga Saipung Constituency hapoh i yahkhmat u Convenor, u Pynkhrawborlang Dkhar da rai ki da iwi i sur wow lai kyrchaan ya ka kyrtong ka NPP, ka Santa Mary Shylla ha kani ka Election 2023 cha ka yung dorbar chna aiñ yong ka jylla.
Ka rai da chim kam ka sur yong kiwa boon (Majority) yong ki dkhot neidaw wym em kyrtong ka Party TMC na kani ka Constituency, kamtæ khnang wa ym sepai i lai luti, da kwah ki wow kyrchaan ya u lane ka kyrtong kiwa sñiawthooh yow poi cha ka thong wei khamtam yow wanrah yei kylla ha ka thaaiñ yong ka Constituency waroh kawi.
Ha ka yalang wa da pynman ha ka 17 tarik uni u bnai ha ka yung ka kyrtong, da pdiang burom ya ki da u pa yong ka kyrtong hanla ym ye ko u ya emlang neibhah wa hap lai beh ko ya kiwa boon ki kaam. Da yoh yei klam na u Pynkhrawborlang Dkhar uwa da ong wa ha ki kattu katni snem kiwa da lai da sepai hi-eh khlem em myntoi wei khlem em ka roi ka paar ha ka thaaiñ waroh kawi, kamtæ da kwah ki yei kylla wei kawa nyngkong toh wow pynkylla chwa ya kiwa mihkhmat.
