U State President ka Bharatiya Janata Party (BJP) Meghalaya, u Ernest Mawrie da kam u wa katkam i yoh yutip, ka Party ha kani ka Election MLA wow man ha ka jylla, ka BJP daw jop ko hadooh 10-15 ngut ki MLA.
U Ernest da ong u leh wa ka BJP u pynyakhun kyrtong ko ha waroh 60 tylli ki Constituency, wei hadooh katni em hadooh 123 ngut kiwa yahkhmat kiwa da paan Ticket na ka BJP wow yakhun ha kani ka Election, heiwa em ki Constituency kam ha Dalu em soo ngut kiwa paan Ticket katwa ha Mahendraganj won hadooh 6 ngut.
Chooh chooh da ong u wa ha ka Election 2018, ka BJP da jop ko du 2 ngut ki MLA wei i yoh Vote ka Party man i kamwa 9.7%, wei da kam u wa katkam i thooh bniah ka Party ha kani ka kynti daw ku ka Vote yong ka chadooh 20-25%.
Heiyatoh won wa i pynbna kyrtong ka BJP, u Ernest da ong u wa ka State Election Committee yong ka Party daw phah noh ko ya ki pyrtuid yong kiwa paan Ticket, wei ya ka rai wa khaddooh wow e Ticket u e rai da ka Central Parliamentary Committee.
U Ernest da ong u leh wa ha ka yalang yong ka National Executive Committee ka Party, da pyntip u cha ki heh ha Delhi ya i man i long wa kamjooh i rukom pynkhreh hapoh ka jylla Meghalaya neibynta ka Election.
