Lai pynskem ka Unit ka KSU ha Huroi

Ka KSU ha ka 19 tarik uni u bnai da pynskem ko ya kiwa kitkaam thymme yong ka KSU Huroi Unit. Ka chnong Huroi man ko kawi na ki chnong wa em ha khappood waka ri Bangladesh wei kawa sahdien bha hadooh katni ka wym pu em sarok uwa da sdang chna ini wa dep, ki thaw sumaar, i bordiñ wa ki thaw puræ.

Neiliang u President warim ka seiñ, u Poly Pohlong da khana u wa heipor yong oo da khang chipor yei pynkrehkaam yei kær pood neidaw wa ki bor District yong ka East Jaiñtia ym em su lut ki ya ka bai thaw cha ki tre thaw wei khaddooh ki tre thaw da yoh ki du 40% ka bai thaw.

Neiliang won u Ostranic Marbaniang, Organising Secretary ka KSU seiñbei da batai bniah u yaka riti krehkaam ka seiñ wei da pynkynmoo u leh yei eh wa ka KSU da tyngkhooh ko ha ki por wa yakhih pyrchah ya ka CAA heiwa da dooh noh ya uwi u dkhot wa chit rhem ha Ichamati ha u snem 2020. Ha u snem 2021 ki bor pulit da pynkut ki yei mynsien u Cherishterfield Thangkiew, ha u snem 2022 i jia ha Mukroh heiwa da dooh yei mynsien ki paradoh parasnaam ha ki kuli yong ki pulit Assam.

Kamtæ da ong u wa ym tip iyi i eh wow maad ha u snem 2023 wei iyi wow jia ya ki jaitbru yong i, wei da ngait skem u wa i em ki khynroo wa yakhih neibynta ka daw bah wa i hok yong ka jaitbru, wa ka jaitbru daw im ko.