U Bindo M Lanong uwa da chah pyndooh Ticket ha ka UDP wow yakhun na Nongkrem Constituency, da ong u wa hadien wa kut ka Election daw lai uiñ biang u cha ka UDP hanla u lai u chakhmat wow yakhun pyrchah ya u kyrtong ka Party, u Lambor Malngiang ha kani ka Election.
U Bindo da ong u wa daw hap u wow yakhun ya kani ka Election kam u kyrtong samen deiwa yieñ na ka liang UDP (Original). Da ong u wa ym kwah u wow mih na ka UDP wei nadooh wa sdang da lai u wow paan Ticket tangwa da kyntait ya oo.
U Bindo uwa man uwi na kiwa seiñ ya ka UDP ha u snem 1997, da ong u wa ym pynpiah u ya ka Party neibhah nadooh wa sdang da em u wa ka UDP, tangwa lada ym pdiang ki daw chong noh u samen.
Hawa yatoh wa i e Ticket, u Bindo da ong u wa da em napyrdi kiwa kyrchaan kiwa da e yumut wow bichaar biang lane wow ong dam noh, wei da pyrkhat u, tangwa kiwa yahkhmat kiwa em ha ka yalang wa da khut ha ka 16 tarik uni u bnai ha Laitkor da e yumut bait ki wow lai chakhmat.
Da ong chooh chooh wa oo ym toh u bru uwa yut seiñ, deiwa pynkynmoo yei ya krehlang wa kiwa yahkhmat warim kam u Dr. Donkupar Roy wa u BB Lyngdoh, heiwa da ong u wa kini kiwa katni ya u tre wa pynpsiah ya ki ym burom de ki tæ kammon u burom ki ya ki paidbah.
U Bindo uwa man kam uwa e buit yong ka UDP da ong u leh wa sñiawsih wow yoo ya u bru wa tang ya ka Matric leh ym pu em Pass bha da kwah u wow man Chief Minister yong ka jylla, deiwa ong wa chiwon u yah ini.
