Ka West Jaiñtia Hills District deilang wa ka ri India waroh kawi da ya ksohkti lang ko wow lehkmen ya ka 74th Republic Day hapoh ka District.
Ha Jowai, u Deputy Commissioners ka West Jaintia Hills, u Batlang S Sohliya, da pynhær u ya ka lama ka ri wei da chim u leh ya ka Rashtriya Salute heipor wa tem yei sur National Anthem da ki khynnah ka JNV School, Mukhla waka Q C Springside Secondary School, Jowai ha ka yalang wa da pynman ha madan Jrisaleiñ, Jowai. Neiliang u DC da e khublei u ya ki paidbah ha kani ka sngi wa kyrpang.
Da em 21 tylli ki dhab wa da chimbynta ha kani ka Republic Day Parade wa kynthup ya ki District Police Jowai, ki NCC na Government Girls’ Higher Secondary Schools, Jowai, ka Meghalaya Bharat Scouts & Guides, Jowai wa 18 tylli ki skur.
Ka JNV School, Mukhla da yoh nyngkong ko ha kani ka yaleh March Pass, wa ar da yoh ka Government Boys’ Higher Secondary School, Jowai wa le won ka St. Mary Mazzarello Higher Secondary School, Jowai.
Da pynyoo rong leh ya ki kari wa da pynriam (Tableau) na ki 13 tylli ki chnat sorkar kiwa da chna heitæ i rukom wow pynyoo ya ki Scheme kamjooh ki kreh wa da pynkrehkaam ki. Ha ini, ka yung krehkaam u District Sericulture Office, Jowai da yoh nyngkong ko, ka yung krehkaam u District Horticulture Officer, Jowai da yoh wa ar katwa yei wa le da yoh ka District Commerce & Industries Centre, Jowai.
Ha kani ka sngi da em leh ki rwai, ki chaad na ki khynnah skur wa na ki dong ka chnong Jowai. Da lai saam baam leh cha ki thaw ri khynnah da ki chnat sorkar wa kiwi de ki seiñ wei da pynman leh ya ka yalehke Final ka U-13 Republic Day Cup hapyrdi ka Demthring SC wa Sabah Muswang SC wa jop da ka Sabah Muswang ha Kiang Nangbah Stadium, Ladthalaboh.
Ha Amlarem Civil Sub-Division won da lehkmen ha madan ka Amlarem Government Lower Primary School, Amlarem heiwa ya ka lama ka ri da pynhær da ka J.U. Kharpuri, Additional Deputy Commissioner, In-charge Amlarem Civil Sub-Division kawa da chim leh ya ka Rashtriya Salute hawa rwai ki khynnah ka Mang Hai Ryum Higher Secondary School, Amlarem ya ka National Anthem.
Da chimbynta ha ka March Pass da 3 tylli ki dhab wa kynthup ya ki pulit wa ar tylli ki skur. Ka Riwar Jaintia Church of God Secondary School, Ladjaplem da yoh nyngkong ko katwa ka Syiem Jingsuk Higher Secondary School, Amlarem da yoh wa ar ko. Da pynbood leh yei pynyoo rong ya ki Tableau da ki 4 tylli ki chnat sorkar ka Sub-Divisional Office heiwa da yoh nyngkong da ka yung krehkaam u Sub-Divisional Veterinary Officer, Amlarem, wa ar da yoh da ka yung krehkaam u Sub-Divisional Agricultural Officer, Amlarem, wa le ka yung krehkaam u Sub-Divisional Officer PHE, Amlarem.
Da yoh leh ya ki rwai ki chaad na ki khynnah skur.
Ha Laskein C&RD Block da pynman ya ka lehkmen ha madan Hula, Moosyiem, Shangpung heiwa u Laskein Block Development Officer, u B. Niang da pynhær u ya ka lama ka ri.
