Hadien wa mih bakla i thoh ha ka Website ka Election Commission of India wa ka sngi thap Vote ha ka jylla Tripura u man ko ha ka 27 tarik u Thohlakhmi deilang waka jylla Meghalaya wa Nagaland, neiliang ka ECI da pynche ko ha Tripura i thap Vote u man hi ko ha ka 16 tarik u Thohlakhmi katkam wa da dep pynbna ini wa dep.
Ka ECI da pyntip ko leh wa heiyatoh waka Section 126 ka aiñ Representation of the People Act, 1951 da khang wow pynmih kiwon kiwon ki kaam wa yatoh wa ka Election lyngba ki TV lane kiwon kiwon ki laad pathai khubor 48 kynta chwa wow thap Vote wei da khang leh wow pynman ya ki yalang paidbah.
Lada em kiwon kiwon kiwa tyngkheiñ ya kani ka kyndon ye ki wow chah kem hadooh 2 snem deilang wa ka kuna.
Ki kaam wa yatoh wa ka Election u kynthup ki ya kiwon kiwon ki khubor wa ye u ktah yei jop i rem ha kini ki 48 kynta chwa u thap Vote wei ini kynthup leh yei pynman ya ki Panel Discussion/Debate.
Ini kynthup i leh ya ki TV/Radio, Cable Network/Internet Website/Social Media wa ha kitai ki 48 kynta ym toh u pynmih kiwon kiwon ki Appeal, i pynsñiaw paidbah, i sur ki paidbah neibynta kawon kawon ka Party lane u kyrtong.
Da khang leh wow pynman ya ki Exit Poll ha kitai ki 48 kynta.
Tangwa ha ki sngi chwa ki 48 kynta won da hap wow paan bor chwa ki laad pathai khubor (TV/Radio/Cable/FM Channels/Internet Websites/Social Media) na ki bor District lane bor sorkar wei wow bood ya ka Model Code of Conduct wa ki aiñ wa da booh da ka Ministry of Information and Broadcasting hapoh ka Cable Network (Regulation) Act yow lait u mih iwon iwon i kulmar. Waroh ki Internet Website wa ki Social Media Platform toh u bood ki ya ki kyndon ka aiñ Information Technology Act, 2000, ka Information Technology (Intermediary Guidelines and Digital Media Ethics Code) Rules, 2021 wa ki kyndon ka ECI.
