Heiyatoh wa i pynkrehkaam ya ka Model Code of Conduct (MCC) hadien wa da pynbna ka Election Commission of India ya ki tarik Election MLA ha Meghalaya heiwa kani ka MCC toh kawa daw neh hadooh ka 02-03-23 hadooh wa dep wow pynbna ya kiwa jop.
Hajrong ini neiliang u DC (Election) ka West Jaiñtia Hills District da thoh u cha waroh ki waheh chnong wa em hapoh ka District yow sñiawthooh ki ya ki kyndon ka Model Code of Conduct kiwa da khang ya uwon uwon u bru lane ka seiñ wow leh kiwon kiwon lane wow klam ya iwon iwon iwa daw wanrah yei sñiaw yaphær jaitbru.
Lada em iwon iwon i klam pyrchah ya kawon kawon ka seiñ lane u kyrtong toh u man bait ya ki kaam wa da kreh ki lane ki Policy krehkaam yong ki. Ym toh u em iwon iwon i klam beiñ ya ki kaam samen lane ki kaam pohyung yong u bru, ym toh leh u pharep khlem em ki sabut wa ki sakhi wa biang. Ym toh leh u yalap Election ha ka rynsan yungmane ha iwon iwon i por.
Waroh ki seiñ wa ki kyrtong toh u kiar ki nei pynbaam poisa, u saam baam, saam kiad lane wow maham ya kiwon kiwon. Ym toh wow pynman yalang hajan ki Polling Station lane wow yalap Election 48 kynta chwa wow thap Vote. Ym chah leh ya kawon kawon ka seiñ lane ki kyrtong wow pynbiang kari ya kiwa thap Vote.
Toh u burom kylliang ya ka yung ka sem yong waroh wei wow kiar u pynman yalang lane yakhih pyrchah ya kawon kawon ka yung ka sem yong uwon uwon ha-yung ha-sem yong uwon uwon lada toh ha yung u/ka kyrtong lane ha yong ki bru.
Kiwa kyrchaan yong ki seiñ wa ki kyrtong u burom kylliang ki ya kiwa yaleh pyrchah wei ym toh wow pynwit ya ki yalang lane ki lai paidbah yong kiwa yaleh pyrchah.
Ym toh u em kawon kawon ka yalap Election chwa ka 6:00 waje i step wa hadien 10:00 waje i miet.
Lada em ka lai paidbah yong ki ar seiñ kiwa ya pyrchah, toh u yakut chwa khnang wym em i wit kawi ya kawi. Kini ki lai paidbah ye ki wow em kattu katni tylli ki kari tangwa ki seiñ wa ki kyrtong hap ki wow pynyoo yei lut i sep waroh.
Ym toh u em leh i thang dur bula ya u kyrtong wei wow pynemkaam du le tylli ki kari hawa lai pait Polling Station.
Lada em ki Montri kiwa lai yalap Election, toh u pynemkaam da ki kari samen ym toh da ki kari wa yoh na ka sorkar.
Kam ki chnong ki thaw ym ye wow khang ya kiwon kiwon wow yalap Election ya u kyrtong lane Party hapoh ini i por yong ka Model Code of Conduct.
Ka yung krehkaam yong u District Election Officer wa ki Returning Officer u booh ki ya ki Static Surveillance Team wa ki Flying Squad ki wow lai wei wow em ha ki chnong waphær waphær. Kini ki Team u kynthup ki ya u Magistrate wa ki pulit ki wow kreh deiwa riñ lang wa ki Video.
Ya waroh kini ki kyndon toh u bood khlem da em i pait chilliang khmat ya uwon uwon.
