Ka Khliehriat Block Congress Committee (KBCC) dap ko dei sñiawsih wei diaw mynsien hadien wa yoo ya i pyrtuid ka kyrtong ka Party napoh 6-Khliehriat Assembly Constituency iwa da pynbna ha ka 28 tarik uni u bnai da ka Jhanika Siangshai.
U Chrispin N Dkhar, President Khliehriat Assembly Youth Congress Committee da ong u wa ka MPCC ym em pyntip næ syllok chwa ko wa kiwa kitkaam ka Block næ District Level wei ini pynyoo wym mano wei i wym burom de ki ya kiwa kitkaam ka Party ha Block wa ha District.
Hadien wa yoo ya ka khubor, ka Khliehriat Block Congress Committee (KBCC) waka Khliehriat Assembly Youth Congress Committee (KAYCC) chirup wa ki Mahila Congress Committee, ki Circle wa ki Unit da chong yalang ki wut-wut ha Khliehriat West.
Ha kani ka yalang da rai wa ym pdiang de ki ya kani ka kyrtong ka Party wei da e por leh 48 kynta ya ka MPCC wow pyndam ya i pyrtuid ka kyrtong wei lada ym ap ya i rai,ka Block, neiliang yong ki leh u rai ki deiwi iwa khor bha.
“Kammon ka MPCC booh kyrtong ko da ka bru wa beiñ wei klambeiñ ya ka Party wei ya kiwa kitkaam ka Party nadooh na jylla wa hadooh ha Block wei kani ka kyrtong (Jhanika Siangshai) da mih (Resign) ko na ka Party Congress ha ka 23 Naisaphra, 2022 wei da psiah ko cha ka NPP ha ka 10 Naikhynde 2022,” da ong ka KBCC.
Kani toh ka Wyrta wa phah da Rimistar Dkhar u Secretary ka KBCC.
Puræ leh: Pdiang sñiawbha ka NPP ya kiwa yahkhmat warim ka Mahila Congress ka East Jaiñtia Hills
