U President ka National People’s Youth Front (NPYF), u Kitborlang Nongrem da kyntait u warr yei pynbaad wa embynta u wow kynroi yow pynrem ya u kyrtong ka NPP na Ranikor Constituency, u Martin M Danggo. Tangwa da khana u wa u Danggo deilang wa ki paaid yong oo nadooh ka 28 tarik uni u bnai da lai ki wow yachem wa u Montri Rangbah ka Assam uwa man leh uwa yahkhmat ka BJP ha Assam.
Ini i pynche uni uwa yahkhmat ka chnat khynroo ka NPP toh hadien wa da mih i pynbaad ha kawa kyrchaan yong u Danggo ynnin ka sngi, hawa da ki spah ngut kiwa kyrchaan da rai ki wow mih noh na ka NPP deiwa dawa leh ya u kyrtong uwa ma u MLA wa Speaker warim, u Martin Danggo wow mih noh na ka NPP yow yakhun noh ya ka Election na ka Bharatiya Janata Party (BJP).
Hawa yatoh wa ini i pynbaad ka Pelcy Snaitang wa da em i kynroi wow pynrem ya u Danggo, neiliang u President ka NPYF da pynche u wa itai i yania toh ha ka rynsan ‘WhatsApp Group’ wei toh hajrong ka phang wa ong ya ka NPP wa toh ka seiñ Garo. Da khana wa ini i yatai toh iwa nadooh ka 05-08-22, wei pynrap u wa ini i pynbaad toh wym em de da iwon iwon i daw wow pynbaad yow mih na ka NPP.
Da ong u wa kini kiwa yahkhmat kiwa da mih noh, ki tip che ki wa oo ym mih u na ka NPP wei da tieñ ki wa lada ka NPP pynyieñ kyrtong ko katni, daw man iwa maa ya Danggo, deiwa pynkynmoo leh ya ka Election chiteiñ samoi kawa da dep yong u snem 2019.
Hawa kylli kammon ka Party pyrkhat ko ya u kyrtong ka NPP hadien wa da mih noh u Danggo, u Nongrem da ong wa ym toh i por wa biang wow klam katni, tangwa daw lai u cha Ranikor wow pynman yalang wa jhan yow chim lang yei rai da ki paidbah lada ka Party daw pynyieñ kyrtong ko namo ym pynyieñ ha kani ka Election.
Hawa kylli chooh chooh da ong wa ini toh i rukom leh yong u Danggo hanla ym pynyoo che u wa da mih u na ka Party, neibhah da noh bait u yei eh cha ki paidbah, heithaw wa oo kam uwa yahkhmat toh u yahluti u katwa oo won phah yah pathan u ha ki paidbah, deiwa kylli leh wa jooh em kam utæ uwa yahkhmat uwa bood nadien.
