U khlieh dooh ka National People’s Party (NPP) u Conrad K Sangma ha ka 31 tarik u Duiyatra da ong u wa ka NPP kreh ko wow pynkupbor ya ki khynroo deiwa e khih e kreh ki heipor wa yahkhmat wow lai toor da 2000 tylli ki thuk thuk, heiwa da kynjoh 20 Kilometer chwa wow psiah ha Ampati, kawa jooh man ka thaw wa jooh ksoh u heh ka TMC u Dr. Mukul Sangma.
Hawa e yei klam ha ka yalang ha Ampati, u Conrad da kular u wa ka NPP u e kreh ko hadooh 5 lak ngut lyngba ki seiñ kreh seiñ khih kiwa da sdang nadooh kini ki snem wa dadep.
Da ong u leh wa ka sorkar NPP ha ki san snem wa da lai da wanrah ko ya kiwa boon ki thong krehkaam wa kynthup ya ka PRIME wow yarap poisa wei wow e sikai seiñ khih ya ki khynroo.
Chooh chooh da ong u wa ka jylla em ko chiboon kiwa em sap ha ki kaam yalehke Sports, i put i tem wa kiwi kiwi, wei ka NPP u pyntikna ko wow e rynsan wow pynlut ki khynroo khyllood yei bor i sap yong ki ha ki luti wa biang kam ka ASPIRE Meghalaya waka YESS Meghalaya.
Da pynkynmoo u leh wa ha u 2018, ka NPP ym em jop ko wot kawi leh ka Constituency ha South West Garo Hills, da ong u wa man iwa eh ya ka sorkar wow wanrah ya ki kaam pynroi cha waroh ki MLA neibhah wa kiwa em ha ka liang pyrchah ym bien ki wow krehlang wa ka sorkar, kamtæ da ong u wa bha u yoh ya ki MLA kiwa em ha ka liang wa synchaar.
Da ong u wa ka NPP daw jop ko chiboon ha kani ka jylla wei ka South West Garo Hills leh emkaam u yatylli ki wow pyntikna wa ka NPP jop ko.
Chooh chooh da ong u wa ka TMC toh kawa da piah neibhah boon kiwa jooh kyrchaan ya ka TMC da psiah ki cha ka NPP neibhah ym em yo em mynried ki deiwa em ha ka TMC.
Ha kani ka sngi kiwa kyrchaan ka TMC da psiah ki cha ka NPP wei da kyrchaan ki ya ki kyrtong ka Party kam u Stevie Marak, u Subir Marak, u Sanjay A Sangma wa u Ian Botham K Sangma.
Ha kani ka yalang da em palat 7,000 ngut ki bru kiwa da embynta lang.
