U kyrtong ka NPP na 6-Khliehriat Constituency, u Nehlang Lyngdoh ynne da ka thap pyrtuid u wow yakhun ya kani ka Election MLA 2023 kawa daw pynman ha uni u bnai.
U Nehlang leh da man u kam u kyrtong wa nyngkong dooh wow thap pyrtuid na waroh ki Constituency wa em ha Ri-loom Jaiñtia hadien wa da uiñ biang u cha ka kaam saiñhima hadien 10 snem.
Ya u Nehlang da synraan da kiwa ha-yung ha-sem u deilang wa kiwa kyrchaan wa kynthup ya u Chairman ka JHADC u Dr. Sankey Shangpung wa ki MDC warim wa kynthup ya u Joinriwell Pyrtuh wa ka Violet Lyngdoh.
Kiwi de kiwa da thap pyrtuid ynne ha East Khasi Hills won toh u Osaphi Smitson Jyrwa, u kyrtong ka UDP na 13-Mawryngkneng Constituency, ka Wanpynhun Kharsati na 16-East Shillong kam ka kyrtong samen, u Kyrsoibor Pyrtuh na 17-North Shillong kam u kyrtong samen waka Angela Rangad na 19-South Shillong kam ka kyrtong samen.
Na West Khasi Hills da thap pyrtuid u Gigur Myrthong, u kyrtong ka NPP na Mawshynrut.
Na Ri-Bhoi District da thap pyrtuid ki 4 ngut ki kyrtong ka Congress wa kynthup ya u Charles Marngar na 8-Mawhati Constituency, u Dr. Celestine Lyngdoh na 11-Umsning Constituency, u Stanlywiss Rymbai na 12-Umroi Constituency waka Rona Khymdeit na 9-Nongpoh Constituency.
