U kyrtong ka United Democratic Party (UDP) na Nongthymmai, u Dr. Jemino Mawthoh uwa man leh u General Secretary ka Party da ong u wa ym em wa ye u chna sorkar hadien ka Election khlem ka UDP, deiwa pynrap leh wa ka UDP daw wan ko hakhmat dooh ha kani ka kynti wei ym ye wow wan chna sorkar khlem da emlang ka UDP.
U Dr. Jemino Mawthoh uwa man u MLA warim na Nongthymmai uwa da lai u wow thap pyrtuid ha ka 6 tarik uni u bnai wow yakhun ya ka Election, da pynsñiaw u yei kyrmen wa ka UDP daw yoh ko boon ngut ki MLA wei daw yoh ka laad wow yahkhmat ya ka sorkar wa u Montri Rangbah yong ka jylla u man u na ka UDP.
Hawa kylli hajrong ini i klam da ong u wa ha ka sorkar warim, ka UDP da em ko du 6 ngut wei da embynta ko wow pynlai ryntih wei wow pynskem ya ka sorkar. Da ong u leh wa hanla ka Party em ko i duna heini heitai tangwa kam ka Party daw pyrchang ko wow pynwandur biang ya ka Party.
