Kam chibynta wow poi cha ka thong jop ha kani ka Election MLA 2023 hapoh Meghalaya, neiliang ka seiñ Congress ynne da pynbna paidbah ko yei kular Election wa da e pyrtuid “Meghalaya a Five Star State” kiwa emlang 5 tylli ki kular wei ya ini da pybna da u President ka Meghalaya Pradesh Congress Committee, u Vincent Pala deiwa emlang u AICC General Secretary In-charge ka Meghalaya, u Manish Chatrath ha ka yalang wa da pynman ha yung krehkaam ka Party ha Shillong.
“U phah poisa i T. 3,000 chi bnai cha ki manbei wa psa khon samen kiwa dooh wa duk namo kiwa man kam ki BPL yow yarap ya ki u pynheh pynsan ya ki khon kam kawi na ki 5 tylli ki kular yow yarap ya ki manbei yow man ki kiwa laitlooid wow pynlai ya ki kaam yung wei deiwa e T. 3000 chi bnai da mut wa T. 36,000 chi snem iwa daw yarap leh wow su ya ka bai skur ki khynnah,” da ong u Vincent Pala.
“I wa ar won iwa kular i toh wow pynyoh kreh ya waroh kitu kiwa da em hok wow yoh na kawi pa kawi ka manyung ka Meghalaya. I duna ki laad yoh kreh da pynkhuslai ko ya ki khynroo wei dei wym yohsa da hap ki wow lai thooh kreh cha jngai kam ha New Delhi, Mumbai, Kolkata wa kiwi kiwi de yow pyndap yei emkaam ki,” da ong u Vincent deiwa pynrap wa ka Party daw pynlait ko ya ki khynroo ka Meghalaya nei dooh mynsien, dooh kyrmen.
Neiliang won u Manish da ong u wa kani ka sorkar wa yahkhmat da ka NPP-BJP hapoh ka jylla ym em leh ko iyi iyi leh yow yah luti ya ki khynroo ha ki luti wa tne wa biang.
“I krehkaam ka aiñ toh iwa chah ktah nyngkong nei wym biang ka synchaar khadar. Boon ki khynroo da chah pynbiej, da chah yah bakla ki hadooh wow khayi drugs na baar iwa da ktah chooh chooh yei long i man,” da ong u Manish deiwa ban joor wa ka Congress Party toh kawa da kular wow pynlait ya ka Meghalaya nei drug.
U Manish da kular u leh wa ka Congress u kreh ko yow pynlait ya ka Meghalaya na ki kaam baamtooh deiwa wanrah ya ka aiñ wow pynyoo yei khooid i suba kaw wow man kam ka bei ka RTI. “Ka sorkar Congress dadep wanrah ko ya ka aiñ Right to Information Act yow pynkup bor ya kiwa chong chnong tangwa ka sorkar u Modi ha Delhi wa ka NPP hapoh ka jylla da pyntlot ki ya kani ka aiñ kajiak chisien wei ha kawi ka sngi ym em bor de ko,” deiwa pynrap wa ka aiñ ka Congress daw pyntikna ko wa ki sorkar wa wan hadien daw hap ki wow booh (Upload) ya waroh ki kot ki sla kiwa yatoh wa ki kaam pynroi ha ki Website ka sorkar 6 bnai hadien wa da pyndep yei kreh yow pyntikna wa waroh i jait toh iwa khooid kamjooh yow pyndooh jait leh yei baamtooh.
Ka Congress da kular ko leh wow pynbiang bordiñ khlem thut cha ki yung ki sem wa ki yaaw ki haat deiwa ong wa i dooh bordiñ da boon kynta da ktah ko ya ki khynnah wa lai puræ wei deiwa pynbiang bordiñ daw pynku ko leh yei krehkaam ki karkhana kamjooh ki khynnah.
