Hadien wa kut i e por wow randien ki kyrtong ynnin ka 10 tarik katkam wa da booh por da ka Election Commission of India, ym em uwi leh u kyrtong wa wan chakhmat wow chim ya ka rai wow dam yaleh Election na waroh ki 60 tylli ki Constituency yong kani ka Election MLA 2023.
Ini mut i wa waroh ki kyrtong wow yakhun Election da em ki 375 ngut wa kynthup ya 36 ngut ki kynthai kiwa boon dooh ha East Khasi Hills District kiwa em 14 ngut ki kynthai.
Ka East Khasi Hills leh man ko kawa boon dooh ki kyrtong kiwa em 116 ngut na ki 17 tylli ki Constituency wei hei wa ar da em ka West Garo Hills wa em 69 ngut ki kyrtong (4 ngut ki kynthai) na ki 9 tylli ki Constituency.
Hei wa le toh ka Ri-Bhoi (5 tylli ki Constituency) kawa em 35 ngut ki kyrtong (7 ngut ki kynthai) wei hei wa soo toh ka West Jaiñtia Hills (5 tylli ki Constituency) wa em 26 ngut ki kyrtong.
Kiwa duna dooh toh ha Eastern West Khasi Hills kawa em ar tylli ki Constituency heiwa da em 9 ngut ki kyrtong (2 ngut ki kynthai).
Ka East Jaiñtia Hills leh kawa em ar tylli ki Constituency da em ko 10 ngut ki kyrtong (2 ngut ki kynthai).
Kam wow pynkynmoo wa ka sngi thap Vote man ko ha ka 27 tarik uni u bnai kawa daw sdang nadooh 7:00 waje i step hadooh 4:00 waje i janmiet heiwa kiwa thap Vote hapoh ka jylla da em ki waroh 21,61,129 ngut.
