Ka Movement For Change (MFC) kawa man ka dhab ki bru wa kreh monsñiawbha wa yahkhmat da u Chandame Sungoh kam u Chief Convenor wa u Phermaiñ Samayang kam u Convenor da lai yachem ki deiwa e dei thoh ha ki Returning Officer ka Nartiang, Jowai, Raliang waka Mowkaiaw Constituency deilang ha u Deputy Commissioner ka West Jaiñtia Hills District hanla ym em yoh ki wow yachem lut ya waroh neidaw wym em ki.
Neiliang ka MFC hei thoh da ujor ko pyrchah yei leh arsap wei leh chiliang ki waheh chnong ya ki Party kamjooh ki kyrtong waphær waphær hapoh kini ki Constituency.
Da pyntip wa neiliang ka seiñ da yoh ko ya ki ujor na ki paidbah wei wot na ki kyrtong wa em ki waheh chnong kiwa lehbor wei thombor yei hok yong ki heiwa hawa wan ki kyrtong kiwa boon poisa wa kiwa rap boon paaid tæ da leh kyrpang bha yei pynkhreh wa i pyntip hapoh chnong poh thaw wa ki rukom klam rukom pynlai ya ka yalang yalap Election.
Tangwa hawa wan won ki kyrtong ki wym em poisa ki wym em kiwa boon paaid tæ wot tang ka pyntip leh ym em ki hapoh chnong poh thaw wei ym em leh kiwa chong chnong kiwa wan ap wei ka rukom pynkhreh wa ka rukom pynlai wa ka rukom klam Meeting leh da phær wei leh arsap bha.
Kamtæ ka seiñ da ong ko wa ini i leh man ko kamwa yoobeiñ wei yoohbeiñ yei hok yong kiwi ki Party wa ki kyrtong. Chooh chooh da ong wa kam ki waheh chnong ym toh wow yachah chiliang ki lane wow arsap ya kiwon kiwon ki Party lane ki kyrtong neibhah ki leh em ki ka hok wow pynsñiaw pyn-ap ya ki yurim wa i thmu yong ki. Ki paidbah leh em ki ka hok wow sñiaw wow ap yei klam wa ki thong ki Party wa ki kyrtong. Wei ini i leh chiliang wa i leh arsap yong ki da tyngkheiñ yei hok ki Party, ki kyrtong wa ki kyndon ka Model Code of Conduct.
Hajrong ini da kyrpaad joor ya kini ki Returning Officers wa ya u Deputy Commissioner leh wow chimkhia ya kani ka kaam. Wei da kyntu leh ya ki waheh chnong waroh wa ymtoh u pynyoo ki ya kam ini i leh arsap wei leh bru-khloo yong ki. Toh u ya krehlang ki neibynta ka bha ka miat yow lai bait lai ryntih ka Election.
Lada ka MFC chem ko ya ki waheh chnong kiwa leh ya kam kini ki kaam arsap daw lai ujor chi syndon cha u Chief Election Officer yong ka Election Commission ka Meghalaya.
