Hadien wa mih ki ujor pyrchah ya ki dkhot ka Meghalaya State Commission for Women wa kynthup ya ka Chairperson yong ka, ka Phidalia Toi wa da tyngkheiñ ki ya ka aiñ deiwa lai chimbynta ha kani ka Election MLA 2023.
Heiwa da phah leh ya ka Show Cause Notice cha ka Chairperson ha ka 13 tarik uni u bnai deiwa e por 2 sngi wow jubab wa da tyngkheiñ ko ya ka kyndon Rule 20 ka Meghalaya Services (Conduct) Rules, 2019 kawa da khang ya kiwa man kam kiwa kreh sorkar wow embynta ki wa kawon kawon ka Political Party lane kiwon kiwon ki seiñ kiwa chimbynta ha ka Politics.
Kam wow pynkynmoo wa ka Phidalia Toi da lai synraan lang ko ya u kyrtong ka NPP na Jowai, u Wailadmiki Shylla heipor wa lai thap pyrtuid u ha Jowai.
Sa kawi won kawa man kam ka dkhot ka Commission, ka Felicita Majaw da lai ko wow kyrchaan ya u kyrtong ka Congress, u Marbud Dkhar uwa man leh kam u kurim ko heipor wa lai thap pyrtuid. Ka Violet Lyngdoh kawa man leh kam ka dkhot ka Commission da lai ko wow thap pyrtuid kam ka kyrtong ka NPP na 6-Khliehriat Constituency heiwa da chah kyntait ko.
Hadien waroh ini, ki dkhot ka Congress ynnin da ujor ki ha u CEO wow pyndam noh yei man Chairperson ka Phidalia wei kamjooh wow pyndam yei man kyrtong u Wailadmiki.
Ynnin hi ka 14 tarik, ka chnat Social Welfare ka sorkar Meghalaya da pynbna ko ya ka hukum da u Lat ka jylla wa katkam ka chithi wa da phah da ka yung krehkaam u Chief Minister kawa em ya ka tarik 31-01-23, da pyntip wa da dep pyndam noh yei por wa krehkaam ka Meghalaya State Commission for Women nadooh ka 18-01-23. Ka Commission wa katni toh kawa da pynbna ha ka 15-12-21.
Ka 18-01-23 man ko leh ka sngi wa pynbna tarik Election ka Election Commission of India neibynta ka Meghalaya, Tripura wa Nagaland.
Puræ leh: Dawa ka Congress wow pyndam yei man kyrtong u Wailadmiki Shylla
