U National President ka Bharatiya Janata Party (BJP), u J.P. Nadda ynne da pynlait u ya ki kular krehkaam namo ka ‘Manifesto’ yong ka Party neibynta kani ka Election MLA 2023 ha Meghalaya, wei ya kani ka Manifesto yong ka BJP da pynlait ha Shillong deiwa ya emlang kiwa yahkhmat wa ki wakreh ka Party.
Najrong ki thong wa ka Party da booh ko, u khliehdooh ka BJP da ong u leh wa lada ka BJP wan ko hei bor ha kani ka jylla, daw phah takit ya waroh ki kaam baamtooh ha Meghalaya deiwa thung da ka Special Task Force kawa daw khlieh da Judge wa da chong ngiah ka Supreme Court.
Hawa yatoh wa ki kaam tih mooyong, da ong u wa ka BJP daw wanrah ko da ka Task Force kawa daw pait yei tih mooyong pyrchah ya ka aiñ, wei wow wanrah leh ya ki laad tih mooyong kiwa man katkam i stat ka juk wa katni namo ka Scientific Mining.
Hawa yatoh wa ki kaam khappood, u Nadda da ong u wa ka BJP daw pyrchang ko wow pynbait ya u pood u ang hapyrdi ka Meghalaya wa Assam, wei leh wow booh ya Police Outpost wa pura ha waroh ki khappood. Da ong u wa ini ymtoh ka khappood India wa Pakistan, neitæ i daw dei yaklam daw pynbait ryngkat i ya krehlang wa ka sorkar pyrdi.
Hawa pynbna ya ki thong wa ka BJP da booh ko neibynta ka jylla Meghalaya, u Nadda da ong u wa ka thong yong ka Party toh wow pynkhlan ya ka Meghalaya wei i khlan yong kani ka jylla toh deiwa pynkhlan bor ya ka BJP.
U khliehdooh ka BJP da ong u wa lada ka BJP yoh ko wow synchaar, daw pynku noh ya ka tulop ki wakreh sorkar deiwa pynkrehkaam ya ka 7th Pay Commission, wei pynrap u wa ya ka tulop leh daw pynlait ha i por kaba biang.
Hawa yatoh wa ka rep ka riang, da ong u wa kani ka kaam toh kawa hakhmat bha yong ka BJP wei ka Party da rai ko wow pynku da T .2000 ya i yarap lyngba ka Kisan Samman Nidhi kawa da e waroh chi kattu T. 6000 chi snem.
Hawa yatoh wa i pynkupbor ya ki kynthai, u Nadda da ong u wa ka BJP daw wanrah ko ya kawi ka Scheme kawa da e naam ya ka Phan Nonglait, wei kani toh wow e T. 50,000 lada kha khon kynthai, wei chooh chooh daw e leh yei lai puræ wa khlem emkaam u su ya ki khynnah kynthai nadooh Class KG hadooh Post Graduate. Da ong u leh wa daw e da ki Scooty ya ki khynnah kynthai wa wan na ki manyung wa dooh kiwa lehbha ha ki Exam waphær waphær. Neibynta ki kynthai daw booh bhah 33% ki kreh sorkar namo ka Reservation for Women. Wei daw booh leh ya ka Phan Nonglait Battalion ka wow man ka Police Battalion neibynta ki kynthai donhi.
Da ong chooh chooh u wa ka BJP daw e ko leh yei baam neibynta kitu kiwa baam rachon (PDS) deiwa pyntikna wa waroh yoh ki yeini i hok, wei wow pynku leh ya ka bhah poisa neibynta kiwa chah sumaar lyngba ka Ayushman Bharat (Insurance) deiwa pynku cha T.10 lak na ka T.5 lak najrong wa wanrah ya ki sarok wa bha wa ki thaw puræ Doctor.
Kiwi de ki kular toh wow wanrah ya ka Tribal Museum, ka Tribal War Memorial yow kynmoo warom ya u Pa Togan Sangma, u Tirot Sing wa u Kiang Nangbah. U e T. 10 lak cha ki dorbar chnong, ki Elaka neibynta wow pynlai ya ki kaam synchaar khadar yong ki.
Neibynta ki kaam uiñke suwari daw pynlut T. 1000 klur yow pynpawnaam ya ka Meghalaya hapoh ka ri wa hapoh ka pyrthai. Daw sdang leh ya ka Meghalaya Tourism Skill Mission deiwa e sikai yow yoh kreh 1 lak ngut ki khynroo.
Daw sdang leh ya ar tylli ki State Award kawa tip kam ka ‘U Soso Tham State Award’ kawa T. 10 lak cha kitu kiwa pliah ya ka ktien thylliej tynre kamjooh da dustur riti wa ka ‘U Jeebon Roy State Award’ kawa T. 10 lak cha kitu kiwa kreh yow kyntu kynrong ya ka imlang sahlang.
Da kular leh wow pynmih ya ka Dictionary neibynta ka ktien Khasi wa Garo kam chibynta wow pynneh pynsah ya ka ktien ka thylliej tynre wei wow pynchlur leh u chna phlim ha ka ktien yong idæ.
