Ka Voice of the People Party (VPP) ynne da pynlait ko ya ka thong krehkaam wa ki kular Election namo ka Manifesto kawa da e pyrtuid Vision for Meghalaya hajrong ki phang im sngi wa ong “Pynkhai-im, Pynbha wei Pynkylla” ya ka jylla.
Hapoh kani ka Vision for Meghalaya da em 10 tylli ki angnood wow yoo hapoh ka jylla wei kitæ toh:
Yow man ka jylla kawa chngaaiñ wei kawa skem ki pood wa ka khayi pateiñ deiwa pyndooh jait yei dooh i duk.
Yow yoh ya ka jylla kawa em kiwa yahkhmat wa chemphang, kiwa khlan wa kiwa chlur.
Yow pyntikna wa em i chongsuk ha waroh ki liang yow pynku yei roi i paar liang wanang hapoh ka jylla.
Ka synchaar paidbah hapoh ka jylla toh u em ko ki yurim wa skem, kawa khooid wa suba, kawa em i bahkhlieh wei ka wym leh chiliang.
Waroh iwa em hapoh ka jylla u bhah bynta mar ryngkat wei u pynemkaam khlem da pynsepai.
U burom wei wow pynneh yei rukom mantre ya ki thaw ki bhaw kamwa da leh nadooh ki por warim wei wow pynkhlan leh yeini i rukom.
U yada ya ka rymaw kamjooh wow pynneh pynsah ya ka wei wow pynchna ya kiwa da chah pynsih.
U pynman ya ka Meghalaya kam ka jylla wa biang dooh wow wanrah yei seiñ khih namo ka Investment.
U pynku wei pynkupbor ya ki khynroo khyllood ha ka puræ puthi yow ye ki u yakob wa kiwi hapoh ka pyrthai.
U em ka burom ya ki kynthai wa chynrang wei ym em ka leh chiliang khmat hajrong ini.
Da kini, neiliang ka VPP da angnood ko wow pynkhai im biang yei pyrkhat pyrdaiñ wa chongnia da kiwa bait wa bha yow pynsarong ya ka longbru manbru wa bha wa da yoh pateiñ na ki longchwa manchwa wei wow pynkylla dur ya ka Meghalaya kam ka nongmuna wa kynsai ha ka ri India hi waroh kawi.
