Kam chibynta wow pynman ya ka yalang pynsñiawthooh paidbah chaphang ki kaam poisa poilaiñ kawa da lehlang ha waroh kawi ka ri, da pynman ya ka Financial Literacy Week 2023 ha yung dorbar ka Sabahmuswang, West Jaiñtia Hills ha ka 14 tarik uni u bnai.
Ya kani ka yalang da wan wow wai da u Olden Nongpoh, General Manager wa Officer-in-Charge (GM(O-i-C)), Reserve Bank of India, Shillong wei da emlang leh u Block Development Officer (BDO), Thadlaskein Block, DDM wa kiwi de ki sahep ki Bank wa em ha kani ka thaaiñ.
Neiliang u GM (O-i-C), RBI wa u BDO da khana ki ya kiwa boon ki myntoi wa yoh lyngba ki Bank kamjooh deiwa em ya ki Bank Account.
Ki sahep ka RBI, Shillong da khana ki ya kiwa chimbynta kammon wow man kiwa syndong heiwa kam kiwon wa hoi u leh wa ki wym hoi u leh heiyatoh wa ka Digital Banking, kamjooh leh kammon u leh lada chah thok wa ki laad wow ujor wa ki Bank.
Da wan wow chimbynta kamwa 80 ngut nadooh ki warep, ki dkhot ki SHG wa kiwa seiñ khih.
Da saam leh ya 84 tylli ki Sanction Letter kiwa dapoi T. 2.03 klur na ki Bank wa em ha kani ka thaaiñ cha kiwa wan chimbynta. Da pynkupburom leh ya ki kattu katni kiwa kreh Bank da ka RBI Shillong.
Da pynman leh ya ka yakob Quiz wei ya kiwa jop da e da ki muna wa ki kot lakdop chaphang ki kaam poisa poilaiñ da ka RBI Shillong.
