U District Election Officer wa Deputy Commissioner (Election), West Jaiñtia Hills da pyntip u wa katwa ki sngi thap Vote ka MLA Election 2023 da jan ki, ka yung krehkaam yong u Deputy Commissioner da chem ko wa da em i pynkhreh wa i pynbiang ya ki Rally/Campaign da ki bru wa pawnaam namo ki Star Campaigner kamjooh kiwa yahkhmat yong ki Party waphær waphær wei kini leh hap ki wow bood ya ka Model Code of Conduct (MCC).
Kamtæ hajrong ini, u District Election Officer, DC (Election) WJH da pynmih u ya kini ki kyndon ha wah:
Da khang pyrchah wow biah ya ki Poster næ wow pynyieñ wow wah ya ki Banner næ wow seh ki lama lane u thoh roi ya iwon iwon wa yatoh chaphang ka Party ha ki yung krehkaam ka sorkar (Government Building) wa hapoh u pood u ang yong ki. Kini leh u kynthup ki ya ki sarok, luti lai kjat, ki kynroh, ki Bus Stand, ki kari kamai, ki thaw pynmih bordiñ, ki chrot boridiñ, ki Park yong paidbah, ki yung skur wa ki Hospital.
Da khang pyrchah ya kiwon kiwon ki Party wow piah poster, u seh lama, u thoh u liar kiwon kiwon ha ki yung lane ki thaw yong ki bru samen khlem da yoh bor na ki tre yung tre thaw.
Da khang pyrchah ya kiwon kiwon ki Political Party, ki kyrtong wow pynmih kulmar næ pynwit næ khanglaad ya ki yalang, ki lai paidbah, ki yalap Election yong kiwi won ki Party lane ki kyrtong deiwa khloh leh ya ki Poster, deiwa saam da ki kot lakdop yong uwi won u kyrtong heipor wa em ka yalang, ka lai paidbah yong uwon uwon u kyrtong neibhah kani man ko pyrchah ya ki kyndon aiñ Section 127 ka Representation of the People Act, 1951.
Da khang pyrchah ya kiwon kiwon ki Party, ki kyrtong wow yalap Election hapoh 100m naka Polling Station katkam ka kyndon Electoral Offense hapoh ka kyndon Section 13 ka Representation of the People Act 1951.
Toh u pyntip chwa hei por wa biang cha ki bor pulit ka District hawa pynman ya ka yalang ha kawon kawon ka thaw wa da booh.
Emkaam wow yoh bor u pynemkaam ya ki tanghæng lane kwion kiwon ki laad pynsawa na u DC deilang ka NOC na u waheh chnong wa na u SP kamjooh.
Kamtæ da kyrpaad ya waroh wow burom ya ka hok chongsuk chongsaaiñ yong uwi pa uwi.
