U National President ka National People’s Party (NPP), u Conrad K Sangma da kyntiat lut u yei pynbaad ka BJP wa oo wa leh tæ ym yoh bor wow pynman ya ka yalang yalap Election u Prime Minister ka ri, u Narendra Modi ha P.A. Sangma Sports Complex ha Tura heiwa ym em e bor da ki bor District ka West Garo Hills District.
Da ong u wa ym embynta u heini wym e bor wow pynman ya ka yalang u Prime Minister, neibhah yei e bor wow pynman ya ki yalang yalap Election toh iwa e da ka Election Commission of India wei ki bor District hap ki wow bood ya ki kyndon ka Commission.
“Waroh i e bor da wan i neiliang ka Election Commission of India wei deiwa bood yeiwa phah ki, ki bor District leh da leh ki yeiwa toh u leh ki. Wow pynmih yei pyrtuid ka NPP, i pyrtuid yong nga toh iwa bakla neibhah nga leh em ki yalang wa kwah oo u pynman ym em yoh bor O,” da khana u Conrad.
Chooh chooh da ong u wa kam kini jooh jia ki heipor ka Election tangwa ka BJP da pynheh ko ya ini i kaam. “Tangwa da ong i nadooh wa sdang kani ka Stadium em ko ar bynta. Ka bynta nyngkong toh ka Football Stadium, kawa da dep wai. Kawi won ka bynta toh ka Indoor Stadium waka Swimming Pool ki wym pu em dep chna wei yeini da dep wow klam pynche chwa,” da ong u Conrad.
Yei daw wym em e bor wow pynman yalang, u Conrad da ong u wa ye u man wa neidaw wa wan da u Prime Minister daw em boon ki bru wow wan wei ye u man leh wa ki bor District da sñiaw ki wa u phlang kani ka madan ye u chah ktah neibhah ym toh u Artificial Turf manda em boon ki bru wei heijooh i por leh ym em thaw booh kari ha kani ka thaw.
Puræ leh: Chrai ka BJP wym chah wow pynemkaam ya ka PA Sangma Stadium yow wan yalap Election u Modi
