U National Vice President ka National People’s Party (NPP), u Prestone Tynsong da pynsñiaw u yei khyrngiat yei pynyoo ka UDP hapoh ka kular Election namo ka Manifesto wow pyndam noh ya ka Memorandum of Understanding (MoU) pynbait pood lada wan hei bor.
Hawa klam wa kiwa thoh khubor, u Prestone uwa man leh u Symbood Montri Rangbah ka jylla da ong u wa chwa wow soi ya ka soskular (MoU) pynbait pood, ka sorkar da khut ko wow yaklam leh wa ki seiñ saiñpyrthai wei kamjooh ya ki seiñbhalang.
Da ong u wa ini i kwah ka UDP wow pyndam ya ka MoU da pynyoo ko wa kiwa yahkhmat toh kiwa em ar yumut, neibhah kitu kiwa kwah wow pyndam ya ka MoU mut wa ym kwah ki wow pynkut noh yei kajia pood.
Kamtæ da ong u wa ki paidbah toh u sñiawthooh ki wa yakam kini ki bru ym toh wow chaniah.
