Ka dorbar yalap Election yong u kyrtong ka UDP na 4-Mowkaiaw Constituency, u Nujorki Sungoh wa da pynman ynnin ha 4-Chnong kitæ ka Musiaw, Umsalang, Latymphu wa Moobandu da man ko kawa chongchit heiwa da wan boon ki paidbah kynthai wa chynrang wow pynyoo yei kyrchaan ya u Nujorki.
Ya kani ka yalang da pynlai da u Waheh Chnong ka Latymphu, u Bormon Lyngdoh.
Neiliang u Rephenus Suchiang, Waheh Chnong ka Umsalang da ong u wa ngait skem u hadooh kattæ kattæ wa ki paidbah ka thaaiñ yong i toh ki paidbah kiwa stat wa tip u pyrkhat jngai neibynta ka mynried ka Constituency yong i neibynta ki khon ki kti yong i.
Da ong u leh wa hawa jied ya uwa mihkhmat emkaam i u pyrkhat jngai chwa ha idæ chwa u chim i ka rai neibhah i maa em ko ya ka thaaiñ yong i lada ym khyrngiat yong bru i.
“Ya ka hok yong nga yong phi wym em wa ye u pynbor. Khut O ya phi waroh u e yei kyrchaan ya u Nujorki khlem em katæ ka mynsien artatien, nga kyrchaan O ya u Nujorki Sungoh wa yoo ya ki kaam yong oo wot ha kani ka chnong yong i heini 4 tylli ki chnong wa yoh u du 120 Vote naka 1300 tam tangwa yoo i yei kaam u kam uwa mihkhmat sakhiat wym em katæ ka mynsien arsap ka mynsien leh chiliangkhmat uwa da yarap ya waroh 4 chnong. Lada dam i u kyrchaan kam ya uni uwa mihkhmat cheiwon u poi kani ka thaw yong i.”
“Nga kam u waheh chnong kani ka Umsalang da rai O wow kyrchaan borbah yow pynjop emburom biang ya oo kamjooh katkam wa man kattæ ar ngut na i ki waheh chnong da kyrchaan i ya u Nujorki wei kyrmen skem sa uwi leh u waheh chnong daw wan noh u wow e i sñiawkhia hadooh kattæ kattæ,” da ong u Rephenus.
Neiliang won u E. Sariang da ong u wa sñiawkhia u hadooh kattæ kattæ neibhah wa da kyrchaan u ya u R. Tang kam u MDC ka thaaiñ la 10 snem tangwa heiyatoh wa u MLA ym em yatoh u wa oo tangwa deiwa pyrkhat jngai u neibynta i bha i miat ka thaaiñ wei dei wym hun wow sihlet ki paidbah hadien ka 2 tarik, da ong u, “Paidbah tip O ya ka khubor ha kani ki chnong wa u MLA wanrah u ya ka Scheme JJM neibynta u pynsuk ya phi ki manyung mansem yow yoh um phi. Tangwa sñiawsih u ong u MDC yong phi won da pyndooh u ya kani ka Scheme neidaw kwah ki u kreh ya waroh T. 6 klur. Iwa phylla wa wot T. 60 lak yoh u kreh da oo tangwa ym em hun u hadooh wa da pyndooh ya kani ka Scheme ha chnong ha thaw yong phi.”
Da ong u wa ini toh iwa sñiawsih wa choon ya phi ki paidbah kani ka chnong, hei sakhiat toh u yoh phi i suk wow yoh um ha jar jiar ki yung ki sem yong phi tangwa da jia hadooh wa dooh phi ya kani ka Scheme JJM. “Pyrkhat paidbah nga kam uwi wa da tipmit phi ha kani ka thaw hawa em i eh yong phi ym jooh dam O u chimkhia neibynta yong phi ha kini ki 4 tylli ki chnong. Kyntu O ya phi dei mynsien wa khian wow sñiawbha u man ki bru kiwa che wa stat ym toh u chah yahbakla ha kiwon kiwon. Khut O ya phi waroh u ya kyrchaan ya u Nujorki Sungoh.”
Neiliang won u Winning G Sungoh, MDC Mowkaiaw da ong u wa em i maa wa khroo bha ya ka jylla yong i katni lada jia i kam ki paidbah ym khyrngiat yong bru i. Daw toh dan (Tax) lut i, neibhah ka sorkar hapoh yahkhmat ka NPP da hiar bha ka yoh ka kot hapoh jylla yong i kamjooh ki High Level ktah ko ya ki paaid wa dooh wa duk. “Pyrkhat bha paidbah ya jynjar chooh chooh phi neini chakhmat.”
Neiliang won u Nujorki nyngkong da pynsñiaw u yei sñiawngooh cha u Blai Kynrad wa da e u ya oo yei laad wow man kam uwa mihkhmat paidbah ha kini ki 5 snem wa dadep wei kamjooh heini i por em u i kyrmen skem wa u Blai Kynrad wow e laad biang u wow man biang kam u pa kani ka thaaiñ wow kit wow bah neibynta yong ki paidbah waroh ryngkat i kyrchaan wei maya i chaniah yong waroh lang.
“Nga pynsñiaw O yei kyrmen hawa yoo O yei boon kiwa kyrchaan ha kani ka 4-Chnong wa mih phi chakhmat wow pynyoo yei chaniah i maya ya nga. Ha kini ki por sñiaw kam u dooh kyrmen O ha kini ki chnong tangwa pyndap ko ya nga dei kmen hadooh kattæ kattæ wa da yoo wa mih phi chakhmat wow e kyrchaan ya nga lyngba i maya donhi. Nga ym em O ka spah, tangwa em O ya ka spah mynsien donhi neibhah nga ymtoh u bru wa suk u leh Business kam kiwi. Nga u bru wa sñiawkhia neibynta ka roi ka paar kammon u pynku ha ka thaaiñ yong nga ha waroh kani ka Constituency yong i. Pynsñiaw O yei sñiawsih heiyatoh wa ka Scheme kawa nga da leh chitom O u wanrah ka JJM ha kini ki chnong yong phi tangwa da sñiawsih u tip ka khubor wa da uwa mihkhmat pathan, u MDC wow lai ujor wow pyndooh noh chisyndon ya kani ka Scheme neibynta ki manyung mansem yong phi waroh”.
“Nga kam u pa kwah O u wanrah tangwa u khon won da pyndooh u. Ini toh i dooh nong ya phi ki manyung mansem ha waroh. I sakhiat ini toh u pynsuk ko ya phi waroh wow yoh um phi ha ki yung ki sem yong phi. Tangwa sihbhah sakhiat phi. Wot u lok sahep sorkar leh mut u wow yah bakla phi uwa da kam u MLA wa kyrriah kreh u cha Garo tangwa yoo phylla wa ka Model Code of Conduct da krehkaam tæ kammon itæ chah pynbaad cha nga wym bna iyi iyi chaphang i kyrriah, tangwa kawa yoo phylla wa uni u paralok Officer dang kreh hi u ha Laskein Block kam u Assistant Engineer. Kani toh wa mut ki u pynkulmar ya phi donhi khnang wow yah bakla ya phi.”
“Nga kam uwa mihkhmat lada pynbaad ki ya nga ha ka yurim, ym em u sñiawphær O. Kamtæ kyntu O ya phi waroh wow sñiawbha phi u man ki bru kiwa em i pyrkhat jngai kamjooh paan O i kyrchaan na phi waroh wow sñiawbha u kyrchaan biang ya nga khnang u yoh biang u pyndep yei angnood yong nga,” pynkut u Nujorki Sungoh.
Kiwi de kiwa klam toh u Shibait Langstang naka chnong Musiaw, u B. Shylla Ex-MDC Thangrain, u B. Chyrmang Ex-MDC Sahsniang, u S. Langwar na Sahsniang, u EC Dkhar, President UDP Mowkaiaw wa kiwi kiwi.
