Ha ka 22 tarik uni u bnai, ka Meghalaya Bharat Scouts & Guides, West Jaiñtia Hills da pynman ko i kynmoo burom ya ka sngi khroo sngi kyrpang ka Scouts-Guides Movement wa tip kam ka Thinking Day & Founder’s Day heiwa ki Scouts, Guides, Rovers, Ranger deilang ki Unit Leaders dawan ya chimbynta ki ha ka yachemlang wa da khut kyrpang ha District Headquarter.
U Adiam U Bthuh, District Secretary, Meghalaya Bharat Scouts & Guides, West Jaiñtia Hills hei klam yahkhmat kam u chongknor da khana pynsñiaw u chaphang ka yurim yong kani ka sngi kawa man ka sngikha yong ki ar ngut ki chi kurim wa chem wa sdang ya ka Scouts-Guides Movement kiwa tip kam u Lord Baden Powell wa ka Olave Baden Powell.
Wow khriñ yei pyrkhat pyrdaiñ ki dkhot ka Scouts-Guides Movement ha kam kani ka sngi da yoh leh i klam wa rap kyrpang neiliang ka Doly Lamare, Asst. District Organizing Commissioner (G) wa na u Ohiwot Laloo, District Commissioner (S), West Jaiñtia Hills District.
Hajrong ka mat kyrpang yong kani ka sngi wa ong “Our Peaceful Future” ka Doly Lamare, Asst. District Organizing Commissioner (G), da ong ko wa katni ki sngi da yoo wa mih ki rukom tynjooh wa har rukom ya i ki bru neidaw wa da hiar dor ka tipbru tipblai, kamtæ kyrsu kyntu ko ya ki dkhot ka Movement wow man ki ki nongmuna wa bha ya kiwi ki bru, toh i kaamram ya waroh ki dkhot nadooh ki khian hadooh ki heh wow thooh laad u wanrah yei chongsuk chongsaiñ wei wow man leh kitæ ki bru kiwa tip u kheiñkor yei kyrkhu ka rymaw neibynta i miat i bha yong ka myntu, ka mynstep, mynried mankawi.
U Ohiwot Laloo, District Commissioner (S), West Jaiñtia Hills hawa e wyrta chula hapyrdi ki khynnah Scouts-Guides, Rovers-Rangers da khana u wa ya kani ka sngi da kynmoo burom hapoh ka Scouts-Guides Movement kam ka dak i leh burom ya ka sngikha yong u Lord Baden Powell wa ka Lady Baden Powell kiwa man kiwa seiñ wa sdang yong ka Movement.
Hei khana bniah chaphang kani ka sngi da ong u leh wa nachwa datip ya ka kam ka World Brotherhood Day neibynta ki chynrang wa ka Thinking Day neibynta ki kynthai tangwa katni ki sngi won datip ya ka deiwi i kyntien kam ka Thinking Day wa ka Founder’s Day.
Chooh chooh kam wow e mynsien ya ki dkhot ka Movement da e u leh ki kyntien sneiñ kyntien kroo ya ki Scouts-Guides, Rovers-Rangers deiwa ong hawa psiah ha kani ka Movement, toh u man ki bru wa em ka thong wow pyndep næ u yoh ya ki kyrdan waphær yong kani ka Movement neitæ kynmoo leh wa i burom i akor toh iwa hakhmat.
Ya kani ka sngi da pynphooh pynchongchit leh da i rwai i chaad wa da chimbynta da ki Rovers-Ranger wa ki khynnah Scouts-Guides.
