Ka yalang yalap Election yong u kyrtong ka NPP na 1-Nartiang Constituency, u Sniawbhalang Dhar ha ka chnong Ummulong hei miet ka 23 tarik da man ko kawa chongchit bha heiwa da em hadooh 18,000 hajar ngut kiwa kyrchaan kiwa da wan mih cha kani ka yalang ha madan Khawang Ummulong.
Ha kani ka yalang da yoh i klam pdiang na u Waheh Chnong ka Ummulong, u Leo Laloo heiwa da yaroh u wei da e u khublei u ya ki kaam wa u Sniawbhalang Dhar da wanrah u chiboon kiwa da e myntoi bha ya ka chnong wei ngait skem u lyngba kini ki kaam wa bha, ki paaid wa chong chnong ka Ummulong daw su kylliang ki yei kaam wa bha yong oo.
Neiliang kawi na ki manbei ka chnong da ong ko wa ym yoh de kam u Sniawbhalang Dhar u wym jooh mylliñ yeiwa emkaam ki paidbah uwa da e yarap ya ka chong kamjooh ya ka niam khlem da leh chiliang.
Neiliang u President ka NPP Youth Wing Nartiang Block, u Bankerlang Siangshai da ong u kam ki khynroo kattu la chisnem tam da kreh ki yow pynjop ya u Sniawbhalang sa chisien neibhah hawa man u kam u Montri sorkar, i kam ki paidbah kam ki khynroo wow yoh u kheit yow soh niebhah da embhah wow yoh ya uwa mihkhmat uwa man kam u Montri wa khlan dooh hapoh ka jylla.
Kamtæ da ong u wa emkaam wow pyndooh yei bichni adnood deiwa pyrkhat jngai yow pait ya ka thong yow pynmyntoi ya ki paidbah yow ku chakhmat.
Neiliang u MDC ka Ummulong-Moodymmai, u Jesse Suiam da ong u wa ar snem hadien wa jop u Sniawbhalang da sih ki sarok ha Ummulong hadooh wym hoi de u lai tangwa khlem da pait yeiwa jooh em kyrtong ka Ummulong wei deiwa ya krehlang wa u waheh chnong, kattæ ka chnong Ummulong da phooh da phieñ ko.
Kamtæ da ong u wa ym toh u ap ya kini kiwa pynsñiaw yaphær neibhah kini toh du kiwa bichni adnood donhi neibhah lada ap ya kini, ka jaitbru yong i ym poi ko cheiwon cheiwon.
Neiliang won u CEM ka JHADC, u Thombor Shiwat da ong u wa ha u 2018, ka Ummulong man ko kawa khor bha wei kawa yatylli wow e yei kyrchnaan ya u (L) Jopthiaw Lyngdoh tangwa waroh kitu ki snarbah u tynde u kyrtong da em ki katni wa u Sniawbhalang.
Da ong u leh wa ya kitu kiwa dang yoh u thap Vote hei sien wa nyngkong wym toh u pynsepai ya ka Vote ki deiwa thap cha uwa daw rem neibhah daw pynjemdaw ko ya ka Vote, neibhah hadien kat chawa lai phi leh da rem bait kamtæ toh u thap cha u Sniawbhalang wa da tikna u yoh yei jop.
U Sniawbhalang hawa e yei klam da e khublei u ya kiwa kyrchaan yong oo ki wym jooh ieh ko kattu la ar tayaw tam wow lai yalap Election iwa pynyoo wa ki bru toh kiwa em yurim ymtoh kiwa chah dai chah thied wei ym toh kiwa chah pynbiej ha kiwon kiwon.
Da e khublei u leh ya waroh kiwa kreh ka Party kiwa da kreh chitom wow pynlai bait ya ki yalang.
