Hadien wa ka Election Commission of India da pynmih ko ya ki SOP neibynta ki 72 kynta hadooh ka sngi niaw Vote wei katkam ka Para 9.6.5, da ong wa waroh i lai i wan ki bru wa ki kari hapyrdi ki jylla, hapyrdi ki District wa cha baar ri toh u man ki kiwa khang.
Kamtæ deiwa pyrkhat leh yei ye u em i pynkhreh heiyatoh wa i rah tiar pynmynsoo, ki tiar yasiat, i saam poisa namo ki jait dih pynmuaid ha ki Constituency da ki bru napoh ka District wa na baar.
Deiwa pyrkhat leh ya iwa da dep jia ha khappood Meghalaya wa Assam wa ye wow em i ktah yei chongsuk weiwa ka West Jaiñtia yabi ko leh waka Bangladesh heiwa em ko u pood wa 37.74 Km uwa ympu kær naar-chieh iwa ye wow pynemkaam da ki damok wow chimkabu heiwa iwa khian dooh i awri ye i wow poi cheiwa heh bha.
Heiyatoh wa ini, neiliang u B.S. Sohliya, District Magistrate, West Jaiñtia Hills District, da pynkrehkaam u da ka Section 144 CrPC wow khang yei lai laitlooid ki kari samen wa ki kari kamai cha kiwi ki jylla wa kamjooh cha kiwi ki District.
Da khang leh yei lait laitlooid ki kari wa ki bru na baar ri wow psiah chapoh District kamjooh da khang ya ki bru u lai laitlooid u wan laitlooid ki na kawi cha kawi ka District lait noh kiwa wan thap Vote na kiwi ki District wa ki jylla.
Kani ka hukum da krehkaaam ko nadooh 4:00 waje i sngi ka 24 tarik hadoh wa kut i por thap vote ha ka 27 tarik.
