U National Vice President ka National People’s Party (NPP), u Prestone Tynsong da beiñ u yei thombor ya ka yung yong ki MLA wa da jied da ki paidbah, heiwa da ong u wa da yoo u wa em ki kynhun wa thmu wow knieh yabor ya ka synchaar paidbah katkam ka riti synchaar.
Da khyrwit u leh ya ki artylli ki seiñbhalang kitæ ka HITO waka HYC deiwa ong wa ym toh de ki seiñbhalang wei toh ki Political Wing yong uwon ræ uwon wei da ong u leh wa ki paidbah toh u bichaar bha ki ya kam kini ki jait kynhun.
Da ong u leh wa ki seiñbhalang da yoo lakam ki Political Wing yong kiwon kiwon ki seiñ saiñpyrthai, neibhah wa em i thmu lehbor yow yoh u chna ya ka sorkar iwa da pynkulmarkhlieh ya ki paidbah ka jylla.
Da kynthah u deiwa eh ya ka seiñ HITO waka HYC deiwa ong wa ka yakhih yong ki toh du wow pynkiñ neibynta i myntoi yong uwon ræ uwon deiwa pynrap wa ym jooh em jia kamni mynnu mynnu wow em kiwa tba ya ka yung ka sem wei wow knieh yei hok wa da rai ki paidbah.
I yataan tylle wow yoh yahkhmat ya ka sorkar wa thymme da joor bha hadien wa da pynbna ya kiwa jop Election MLA, wei ha kani ka yabeh wow yoh ya kiwa yahkhmat sorkar, da yoo leh wa da em ki seiñ wa ki kynhun kiwa da mih paidbah wow pynkhihwin wei khanglaad ya ka NPP wow chna ya ka sorkar wa thymme.
Hawa yatoh wa i kwah wow yoh Chief Minister da u Khasi, da ong u wa ini leh toh katkam i rai ki paidbah wei ym toh wow wanrah yei yahær neibhah toh u nong Meghalaya hi lada toh na Garo, na Khasi lane na Jaiñtia.
Da ong u leh ya kini ki seiñ wa ileh nadooh chwa ka Election ym lai pynche ki wow em kawi donhi ka Party lada kwah ki ya u Chief Minister da u Khasi.
