Ka Deen Dayal Upadhya Community College for Skill Development, Wahiajer ha ka 7 tarik uni u bnai da pynman ko ya ka Farewell Programme yow leh burom wei wow e khublei ya u Prof. H. Lamin uwa man kam u Founder Principal kani ka College uwa da lai chongngiah noh .
Ya ka yalang da pynlai da ka Wanda Lanong, Instructor kawa da e leh yei ktien pdiang sñiawbha wei wow wai phang.
Neiliang kiwa lai puræ da yoh yei klam na ka Wansakaru Pyngrope wei na kiwa kreh da klam da u Wolnish Rymbai uwa man kam u Coordinator.
Ha kani ka sngi da emlang leh u Dr. Phervision Nongtdu, Principal ka Jaintia Eastern College.
Kiwa lai puræ kani ka Community College da e ki leh yei rwai sñiawngooh wei da e kti leh ya ki tiar wow sahkynmoo yei emlang u Prof. Lamin wow e yei chakri yow pynku yei stat i tip.
Neiliang u Prof. H. Lamin hawa e yei klam da e khublei u ya kiwa lai puræ, kiwa sikai kamjooh kiwa kreh kani ka College deiwa e khublei kyrpang leh ya ka kurim kawa da pynman ya oo kam u bru wa ryntih ha ki kaam wa leh u.
Da ong u leh wa i rta yong oo ym chah de ko ya oo wow pteiñ u yei kaam yong oo wei da kitbok kitrwiang u ya waroh wow pteiñ ki yei kaam wa bha yong ki khamtam ya ki khynnah yow yoh ki ya ka mynried wa tyrchaaiñ.
