Kamwa man ha kiwi ki thaw yong ka pyrthai, ki seiñ kynthai waphær waphær da chim ki wow kynmoo næ leh warom ya ka International Women’s Day ha ki dur ki rukom waphær, kamtæ ha chnong Jowai leh ya kani ka sngi da kynmoo warom da ka Women’s Welfare Organisation, Seiñraij, Jowai.
Ha ka yalang ynne ka sngi wa da pynman ha yung Dorbar Niamtre ka Seinraij Jowai, hei pynlai ka Hima Lakiang, Chairperson WWO-Seinraij, da kdar yahkhmat da i ngoohblai ngoohsyiem yong ka Rily Suwer, Executive Member, WWO-Seinraij katwa yei klam i kappæ won heiyatoh wa kani ka sngi da e na u G.H. Bareh, Executive Member, Seiñraij wa man kam u symbood kongsan neitæ i klam e mynsien ya ki kynthai na ka G. Pde, Vice-Chairperson WWO-Seinraij, ka Aloma Passah, Founder Member WWO-Seinraij wa kamjooh leh kyrpang na ka M. Lakiang, DMC-SSA, West Jaiñtia Hills wa man kam ka kongsan yong kani ka yachemlang.
U G.H. Bareh hawa klam kam u symbood kongsan da ong u hawa nujor yei man ki kynthai ha kiwi ki thaw, hapoh ka jylla yong i toh man ki kiwa embhah ha kiwa boon ki liang wei yoh ki i kyrdan wa rap kyrpang heiwa da kyrsu kyntu u leh ya ki kynthai wow man kiwa tip u burom ya u Kni, u Pa katkam i sikai ka niam wa ka yurim yong ka dustur.
Ka M. Lakiang hawa e kyntien kam ka kongsan da klam ko hajrong ka mat kyrpang yong kani ka sngi wa ong “DigitALL Innovation and Technology for Gender Equality” deiwa ong wa kani ka Theme namo ka mat kyrpang da pynchongyurim ha ki le tylli ki rong kiwa kynthup ya ka rong suiñbneiñ jngem (Purple) kawa yieñ ha ka yurim yong i hok wei kyrdan, rong yirngam (Green) kawa yieñ ha ka yurim yong i thrang wei angnood wa i rong lieh (White) won yieñ ko ha ka yurim yong i khooid i suba.
Chooh chooh ka kongsan hawa kdar wow yaklam ya ka phang yong kani ka sngi, ong ko katkam i yah ka juk ka por yong ka Science da yoo sakhiat em chiboon i kylla iwa man leh ka luti wow pynsuk pynjan wei pynsmat yei rukom krehkaam yong i ki bru ha kiwa boon ki liang, tangwa kyruiñ won na kawi ka liang wow yaklam ya ka phang yong kani ka sngi, da ong ko hap i leh wow booh won i yukylli hei pyrkhat pyrdaiñ yong i deiwa sylli bniah wei pynchongnia chong yurim liang wa nang yei man ka juk ka por neibhah waroh ki kynthai em ki jiar i sñiaw, i man i long wei pyrkhat pyrdaiñ.
