Na ki daw wym ye de u kiar, da pyntip cha ki parakur Dkhar, cha phi ki paralok wa cha phi ki paidbah wa ya ka Fete deilang wa ka Lucky Draw yong ka Seiñ Kur Dkhar East Jaiñtia Hills District, kawa da booh u pynman ha ka 11 tarik uni u Wisu (Mar) 2023, ym ye de u pynman ha katai ka tarik wa da kdaw.
Katwa kamtæ ya ka tarik wow pynman won ya katai ka Fete wa i pynkhle Lucky Draw daw pyntip paidbah won hapoh kini ki kajiak sngi hadien wa da dep chong pyrkhat kaam da ka Executive Committee yong ka Seiñ Kur Dkhar East Jaiñtia Hills District.
Heijooh i por leh, da pynkynmoo ya waroh ki parakur Dkhar wa ya ki paralok wa maya wa i pynlai ya ki Ticket Lucky Draw u man hi ko kawa lai bait lai ryntih kamwa jooh man, wei da kyrpaad leh ya ki parakur wa ki lok ki wym pu dep u pynlai lut ya ki Ticket Lucky Draw wow nang pynlai hi ya ki kamwa jooh hi khnang yow ye u pynkhle ya ki ha ka sngi wa thymme kawa daw pyntip won u pynman ya ka Fete ka Seiñ Kur Dkhar East Jaintia Hills District.
Kani toh ka Wyrta katkam wa da phah da u President yong ka Seiñ Kur Dkhar East Jaintia Hills District, u Teras Dkhar.
