U Auguste Kouame, Country Director ka World Bank ynnin da yachem u wa Montri ka sorkar pyrdi wa pait ya ka chnat Development of North East Region waka chnat Tourism & Culture, u G. Kishan Reddy yow yaklam kammon wow ya kreh deiwa rap heh neibynta ka thaaiñ North East.
Neiliang u Reddy da pdiang sñiawbha u ya ki bru ka World Bank wa da ya yahkhmat da u Kouame wei da e khublei u leh yei kyrchaan ka World Bank wow wanrah yei roi i paar ha ka thaaiñ North East waroh kawi.
U Reddy da ong u wa hapoh i yahkhmat u Prime Minister Narendra Modi, ka thaaiñ North East toh kawa da lai chakhmat wow man kam ka kor wa wanrah yei heh i san wei ka World Bank kattæ da man ko ka lok wa emkaam bha ha kani ka thong.
Ha kani ka yachemlang, neiliang u Kouame da yaroh u ya ka sorkar India yei kreh ko neibynta ka thaaiñ North East deiwa ong leh wa ka MDoNER waka World Bank toh u ya krehlang bha ki deiwa yajan ha kiwa boon ki bynta yow pyntikna wa i roi i paar poi i chadooh iwa cha kdong dooh wei wow pynmih ki laad yoh kreh ya ki paaid ka North East.
